Primeiru Ministru, Taur Matan Ruak, asina plaka hodi inagura Postu Tránzitu PNTL. Iha Rotunda Bairru-Pite, kuarta (13/10). Imajen Tatoli/Francisco Sony

DILI, 13 outubru 2021 (TATOLI)— Primeiru Ministru no Ministru Interiór, Taur Matan Ruak, akompaña hosi komandante Jerál Polísia Nasionál Timor-Leste (PNTL), Komisáriu Faustino da Costa, ofisiálmente inaugura postu polísia tránzitu ne’ebé konstrui hosi emprezáriu timor-oan, Salvadór Henrique ‘Mauhoka’.

Biban ne’e, PM apresia no orgullu ba emprezáriu ‘Mauhoka’ tanba hatudu sentimentu solidaridade hodi konstrui postu polísia tránzitu neen ho kualidade.

 “Ohin, Ita iha infraestrutura di’ak oferta hosi emprezariu timor-oan ida no veteranu oan-ida. Ha’u husu ba Komandante atu okupa postu ne’e durante oras 24 no husu Vise Ministru atu tau-matan  loro-loron no kuidadu didi’ak,” Xefe Governu hateten iha seremonia inaugurasaun postu trázitu, iha Bairru-Pite-Dili, kuarta ne’e.

Emprezáriu ‘Mauhoka’ konstrui postu tránzitu neen, hanesan postu rua iha área Bairru-Pite, ida iha área Colmera. Ida iha Hotel Timor nia oin, no ida iha área terminál Becora.

“Ha’u hanesan Ministru Interiór kontente loos no ha’u hakarak prabéniza Mauhoka nia oferta ba iha ita nian institusaun PNTL. Espera katak sai exemplu ida ba emprezáriu sira seluk, ne’ebé opera iha Timor atu banati tuir ida ne’e. La’ós dei’t halo osan, maibé iha mós responsabilidade sosiál ba ita nian sidadaun sira,” Eis Prezidente Repúblika ne’e akresenta.

Nune’e, atuál Ministru Interiór ne’e husu ba komunidade liuliu joven sira ne’ebé hela besik postu polísia atu kuidadu obra ne’e.

Komandante Jerál PNTL, Komisáriu, Faustino da Costa. Imajen Tatoli/Francisco Sony

Iha fatin hanesan, Komandante Jerál PNTL, Komisáriu Faustino da Costa, husu ba membru polísia tránzitu-sira atu utuliza obra ho kuidadu no responsabilidade ba interese povu nian atu asegura ba redusaun asidente tráfegu iha Dili.

“Ha’u agradese no kongratula ba Emprezáriu Salvador Henrique Mauhoka tanba bele oferese ona postu polísia ba Polisia Nasionál Timor-Leste,”

Emprezáriu Timor-oan, Salvador Henrique “Mauhoka”. Imajen Tatoli/Francisco Sony

Entretantu, Emprezáriu Salvador Henrique Mauhoka, hateten, konstrui postu polísia tránzitu ne’e ho inisiativa rasik atu apoia Governu liuliu PNTL atu membru-sira bele iha fatin adekuadu hodi asegura movimentu rodaviáriu iha kapitál nasaun ne’e.

“Konstrusaun ne’e, ha’u nia inisiativa rasik nu’udar timor-oan, katak ita iha oituan bele ajuda malu liuliu ajuda PNTL,” nia tenik.

Jornalista: Natalino Costa

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here