Pesoál saúde hamutuk ho seguransa hein no atu halo verifikasaun ba sidadaun sira-nia kartaun vasina iha pontu entrada Lookeu Ogues. Imajen Tatoli/Celestina Teles.

COVALIMA, 13 outubru 2021 (TATOLI)—Administradór Munisípiu Covalima, Francisco de Andrade, hasai despaixu hodi hamutuk ho seguransa no Servisu Saúde halo verifikasaun ba kartaun vasina ba sidadaun sira-ne’ebe tama-sai pontu entrada.

“Ha’u hasai despaixu ne’e atu apoiu programa Governu hodi halo verifikasaun ba abitante sira-nia kartaun vasina iha pontu entrada. Governu sosa aimoruk ho presu karun maibé vasina AstraZeneca iha fulan-outubru ne’e prazu liu ona, maibé sidadaun barak mak seidauk simu vasina. Entaun, ita halo verifikasaun ba kartaun kinur, nune’e sira bele simu vasina,” Francisco de Andrade hateten ba jornalista sira iha nia kna’ar fatin, kuarta ne’e. 

Nia hatutan, ekipa seguransa verifika komunidade nia kartaun kinur no bainhira deteta katak sidadaun sira laiha kartaun vasina mak pesoál saúde sira prontu fó kredas vasina. 

Ho despaixu ne’e, nia dehan, la viola sidadaun sira-nia direitu tanba sidadaun sira lakohi koopera ho Estadu. Nu’udar sidadaun di’ak, tenke kumpre dever la’ós moris tuir ida-idak nia hakarak. 

Governu nia polítika atu halo prevensaun ba transmisaun COVID-19, dalan úniku mak sidadaun sira tenke simu vasina.

Tanba, nia dehan, membru Governu simu orientasaun hosi Primeiru-Ministru, Taur Matan Ruak, hodi halo kampañia vasinasaun iha territóriu nasionál, nune’e bele enkoraja sidadaun sira bele simu vasina.

“Iha fatin ne’ebé komunidade atu halo movimentu, ha’u tau seguransa no pesoál saúde. Hanesan iha merkadu Zumalai, tanba persentajen simu vasina iha postu Zumalai ne’e kiik liu,” nia dehan. 

Diretòr Servisu Saúde Munisípiuu Covalima, Filipe Pereira Lemos hateten parte saúde no seguransa hala’o verifikasaun iha pontu entrada sira, tanba atividade ida-ne’e hanesan maneira ida hodi hatutan kampaña vasinasaun ne’ebé Governu implementa daudaun. 

“Seguransa sira hala’o verifikasaun mak bainhira deteta abitante sira balun seidauk simu vasina mak ita sei sensibiliza, nune’e sira iha konxiénsia hodi simu vasina,” nia dehan.

Iha munisípiu Covalima, pesoál saúde hamutuk ho ekipa seguransa destaka iha pontu entrada sira hanesan iha área Tafara Salele, iha zumalai no mós pontu entrada Lookeu Ogues 

“Ita aselera vasina tanba vasina AstraZeneca ne’e balun sei liu prazu iha fulan-outubru ne’e. Entaun, molok nia prazu liu, ita bele vasina ona ita-nia komunidade no ita lábele estraga aimoruk ne’e,” nia esplika.

Nia informa, estoke vasina iha armajen munisípiu Covalima hamutuk vial (frasku) 760 inklui mòs iha sentru saúde sira iha Covalima. 

Pasiente COVID-19 hela na’in-haat

Iha parte seluk, nia informa, númeru kazu COVID-19 iha munisípiu Covalima hahú menus tanba daudaun ne’e hela de’it na’in-haat mak baixa hela iha izolamentu.

Ita nia pasiente detetadu COVID-19 iha munisípiu Covalima hela na’in-haat ne’ebé pozitivu no baixa hela iha sala izolamentu,” nia informa.

Hosi pasiente na’in-haat ne’e, pasiente na’in-tolu iha izolamentu óspital referál Covalima no pasiente na’in-ida (1) ne’e halo auto izolamentu iha uma, no pasiente na’in-haat ne’e sira-nia kondisaun di’ak.

Tuir dadus husi Sentru Integradu ba Jestaun Krize (CIGC, sigla portugés) hahu hosi fulan Marsu 2020 to’o 12 Outubru 2021 fó-sai kazu rekoperadu na’in-tolu (3), kazu ativu na’in-10, komulativu rekoperadu na’in-766 no komulativu kazu konfirmadu na’in-778.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here