DILI, 12 outubru 2021 (TATOLI)— Hospitál Nasionál Guido Valadares (HNGV) liuhosi rejista, iha fulan-setembru, ema mate iha sala emerjénsia na’in-ualu maioria sofre moras kardiovaskular no hipertensaun.
Xefi Gabinete Kontrolu, Kualidade no Komunikasaun Sosiál, HNGV Sara Maria Xavier, hateten, iha fulan setembru pasiente na’in ualu ne’ebé mak mate iha emerjénsia maioria kazu atakasaun fuan.
“Iha fulan setembru, pasiente na’in-ualu mate iha sala emerjénsia kauza sofre kardiovaskular no hipertensaun ho idade avansadu 69, ne’ebé balun mate iha dalan mak foin to’o no balun halo tratamentu iha ne’e, maibé la konsege salva,’’ Xefi Gabinete Kontrolu Kualidade no Komunikasaun Sosiál HNGV, Sara Maria Xavier, hateten ba jornalista sira iha knaar fatin, Bidau, tersa ne’e.
Iha fulan setembru, sala triajen emerjénsia rejista pasiente asidente trafégu hamutuk 103, maioria mane.
Alende ne’e, médiku-sira mós fó atendimentu ba pasiente fase-raan hamutuk 584, pasiente foun na’in-251 no pasiente ne’ebé baixa iha HNGV hamutuk 323.
Jornalista : Felicidade Ximenes
Editór : Florencio Miranda Ximenes
