Profesór EBF Ossouala, João Ximenes Freitas. Imajen Agência TATOLI/Natalino Belo.

BAUCAU, 12 outubru 2021 (TATOLI) – Eskola Ensinu Báziku Filliál (EBF) suku Ossouala, postu administrativu Vemasse, munisípiu Baucau hasoru difikuldade menus sala aula ne’ebé difikulta tebes prosesu aprendizajen.

Profesór EBF Ossouala, João Ximenes Freitas, esplika kondisaun eskola ne’ebé didin ho piku hahú dodok nune’e difikulta prosesu aprendizajen iha eskola refere.

“Difikuldade ne’ebé EBF ne’e hasoru mak sala aprendizajen limitadu, primeiru-siklu fatin sufisiente maibé segundu-siklu mak eskola didin uza piku hahú ladi’ak, kadeira no sala aula la to’o,” nia informa ba Agéncia TATOLI, iha Heine-uai, Ossouala, tersa ne’e.

Tanba kondisaun entaun kada aula estudante sira másimu hamutuk 25 pesoál hosi totál estudante 150-resin hosi primeiru-siklu to’o segundu-siklu.

“Bainhira ita halo komparasaun rásiu totál alunu, manorin na’in-ualu sufisiente ona,” João akresenta.

Alende ne’e, tanba distánsia dook entaun EBF Ossouala iha mós klase-paralelu ne’ebé estabelese iha Bubuho’o ne’ebé loke ba estudante primeiru no segundu-anu B hamutuk estudante na’in-15.

Maske nune’e, eskola refere hahú-hikas prosesu aprendizajen hodi prepara ba períodu datoluk hafoin finaliza ezame períodu daruak iha fulan-setembru.

Eskola refere aplika nafatin regra protokolu saúde tuir orientasaun Ministériu Edukasaun, Juventude no Desportu (MEJD) liuhosi serbisu edukasaun munisipál hanesan fase-liman beibeik ho sabaun, prátika distansiamentu sosiál no uza masákra no manorin sira simu vasina AstraZeneca.

Nia konsidera situasaun pandemia fó impaktu ba estudante sira iha eskola refere tanba kuaze fulan-neen prosesu aprendizajen paradu nune’e matéria aprende tarde bainhira kompara ho situasaun normál.

“Sé bele eskola kontinua ativa maibé implementa mak regra protokolu durante prosesu aprendizajen,” João akresenta.

EBF Ossouala rasik filiál hosi Eskola Báziku Sentrál (EBC, sigla Portugés) Aubaka, Triloka ho totál estudante hamutuk na’in-150 resin, manorin nain-ualu kompostu na’in-tolu kontratadu no nain-lima permanente.

Jornalista         : Natalino Belo

Editór               : Evaristo Martins

PUBLISIDADEiklan

HAKEREK NO HATÁN

Please enter your comment!
Please enter your name here