Pesoál saúde prepara ekipamentu vasina hodi fó vasina Astrazeneca ba komunidade iha Sentru Saúde Comoro, segunda (13/09). Imajen TATOLI/António Gonçalves

DILI, 12 outubru 2021 (TATOLI)–Primeiru-Ministru (PM), Taur Matan Ruak, haktuir ba populasaun Letefoho, reprezentante Vatikanu, husu atu enkoraja populasaun simu vasina, nu’udar pre-kondisaun atu Papa Francisco mai vizita Timor-Leste, durante viajen ba Ázia no Pasífiku, iha inísiu tinan 2022 ne’ebé ajenadu hosi Vatikanu.

“Reprezentante Papa iha ita-nia rain, husu ha’u atu hateten ba sidadaun sira, tanba nia hatene Timór maioria Katóliku, se hakarak Papa mai entaun tenke vasina tanba Papa kuandu mai vizita, ita tenke vasinadu hotu ona no seguru mak nia mai,” Xefe Governu, hateten hafoin partisipa kampaña vasinasaun kontra COVID-19, iha postu administrativu Letefoho, munisípiu Ermera, tersa ne’e.

Tuir Reprezentante Vatikanu, Papa Francisco iha inisiativa mai vizita Timor-Leste iha tinan oin (2022).

Nune’e, Xefe Ezekutivu tun direta ba iha postu Letefoho, hodi divulga informasaun kona-ba importánsia imunizasaun iha ámbitu pandemia no husu labele fiar lia falsu ne’ebé sirkula iha komunidade nia le’et, ne’ebé mak hatauk komunidade simu vasina.

Notísia relevante: PM orienta membru Governu hala’o kampaña vasinasaun iha territóriu nasionál

“Ita presiza simu vasina atubele evita moras grave, ospitalizasaun, mate no bele fasilita ba fali normalizasaun foun,” PM akresenta.

Iha biban hanesan, abitante Letefoho, Ines, agradese ba Xefe Governu tanba bele tun direta fahe informasaun kona-ba vasina, tanba durante ne’e nia tauk simu vasina tanba ema habosok komunidade dehan vasina bele halo mate no moras grave seluk tan.

Hafoin hetan esplikasaun hosi PM, komunidade entusiazmu tebes simu vasina iha sentru ne’ebé estabelese.

Hafoin termina iha postu Letefoho, Xefe Governu no komitiva kontinua ba aldeia Asoi Lakau, suku Dukurai.

Atividade ne’e partisipa hosi Vise-Ministru Saúde,  Bonifácio Maucoli, Sekretáriu Estadu Kooperativa, Elizário Ferreira, Reprezentante Organizasaun Mundiál Saúde (OMS) iha Timor-Leste, Arvind Mathur, Diretora Jerál Prestasaun Saúde, Odete Viegas, Autoridade Munisípiu Ermera no komunidade sira.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here