DILI, 12 outubru 2021 (TATOLI)— Ministériu Saúde (MS) selebra ona akordu ho Ospitál Malázia liuhosi iHeal Medical Centre atu instala mákina-ECG eletrocardiograma halo diagnostika ba pasiente moras fuan.
“Ita serbisu hamutuk ho Ospitál iHeal Medicál Centre, Malazia atu mai halo instala ba ekipamentu eletrocardiograma, ne’ebé ita hahú prepara ona sentru atu ekipa to’o iha fulan-oin bele instala,” Diretór Klínika Hospitál Nasionál Guido Valadares (HNGV), Marcelino Correia, hateten iha knaar fatin, Bidau, tersa ne’e.
Maski, epesialista sira hosi ospitál Malazia sediauk, mai halo instalasaun, maibé espesialista kardilójia HNGV kontinua fó atendimentu ba pasiente moras fuan.
Nune’e, Diretór Klínika HNGV ne’e ho esperansa atu redús pasiente moras fuan bá halo tratamentu iha estranjeiru.
“Tinan oin, Ha’u-nia esperansa katak ita hahú redús pasiente moras fuan ba li’ur tanba iha ekipamentu ona atu halo tratamentu iha rai laran,” nia espera.
Daudaun ne’e, HNGV iha espesialista ba moras fuan na’in-hitu ne’ebé halo tratamentu ba pasiente moras fuan ho ekipamentu balun hosi Ministériu saúde.
Jornalista: Felicidade Ximenes
Editór : Florencio Miranda Ximenes