Ekipa halo avaliasaun ba kursu/programa iha instituisaun ensinu superiór. Imajen/ANAAA

DILI, 12 outubru 2021 (TATOLI)–Ajénsia Nasionál Avaliasaun Akreditasaun Akadémika (ANAAA) asegura hela rezultadu avaliasaun no re-avaliasaun ne’ebé ekipa halo ba kursu ka programa 25 iha Instituisaun Ensinu Superiór Públiku no Privadu (IESPP).

Diretór Ezekutivu ANAAA, Edmundo Viegas, relata, ekipa  finaliza ona atividade maibé rezultadu mak seidauk bele fó sai tanba sei iha prosesu lubuk ida maka presiza halo.

“Ami seidauk determina bainhira bele fó sai rezultadu ba públiku tanba ami hein hela ekipa avaliadór sira halo hela relatóriu, bainhira hatama ona relatóriu mai ami iha tempu besik maka ita sei prosesa,” Diretór informa ba Agência TATOLI, iha ninia knaar fatin, Matadoro, tersa ne’e.

Objetivu avaliasaun atu asegura elijibilidade no kualidade programa ne’ebé oferese hosi instituisaun ensinu superiór tuir padraun no kritéria estabelesidu.

Nune’e, bainhira ajénsia simu relatóriu sei entrega ba Sekretariadu Tékniku ANAAA atu avalia, hafoin aprezenta iha enkontru Konsellu Diretivu hodi hetan deliberasaun ka apresiasaun, hodi ikus liu foin submete bá Ministériu Ensinu Superiór, Siénsia no Kultura (MESKK) hodi hetan aprovasaun.

Kursu 25 ne’ebé hetan avaliasaun no re-avaliasaun ne’e, kompostu hosi kursu neen iha Universidade Nacional Timor Lorosa’e (UNTL) hanesan kursu Edukasaun Fízika no Desportu iha Fakuldade Edukasaun Arte Umanidade hetan re-avaliasan, inklui kursu lima seluk hanesan Relasaun Internasionál, Komunikasaun Sosiál, Lian Tetum, Farmásia, no Kursu Nutrisaun.

Enkuantu, ANAAA halo avaliasaun kursu tolu iha Universidade Orientál Timor Lorosa’e (UNITAL) no  Instituisaun Superiór Cristál (ICS) kursu ida inklui iha Dili Institute of Technology iha kursu ida.

Aleinde ne’e, Ajénsia simu ona relatóriu atu halo avalisaun ba instituisaun Ensinu Superiór ualu.

“Ita simu ona relatóriu hosi instituisaun tolu hanesan UNTL, Canosa no ICR, karik semana ne’e  ami bele hahú serbisu ona,” nia akresenta.

ANAAA rasik iha ona meta, iha outubru ne’e nia klaran to’o novembru nia rohan, avaliasaun ba instituisaun ualu tenke ramata inklui polo iha munisípiu sira.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here