COVALIMA, 11 outubru 2021 (TATOLI)—Administradór Munisípiu Covalima, Francisco de Andrade, informa iha tinan ne’e projetu Planu Dezenvolvimentu Integradu Munisipál (PDIM) foun munisípiu Covalima prioridade ba konstrui Rezidénsia Administradór (RA) no edifísiu Postu Administrativu (PA) Maucatar ho lutu (moru) haleu.
Administradór ne’e hateten, projetu PDIM konstrui rezidénsia administradór nian seidauk hahú tanba sei hein Planta no Kadernu Enkargu (BoQ) hosi nasionál, hafoin loke konkursu ba kompañia hodi konstrui rezidénsia administradór munisípiu Covalima.
“Atu konstrui rezidensia administradór Covalima, dezenu seidauk mai. Bainhira mai ona, ita sei loke konkursu hodi konstrui rezidénsia ne’e,” Administradór Munisípiu Covalima ne’e hateten ba Agência Tatoli, iha nia kna’ar fatin, Covalima, segunda ne’e.
Konstrusaun edifísiu postu administrativu Maucatar, nia informa, foin lalais kompánia asina ona kontratu no agora hein atu implementa.
“Progresu implementasaun ita foin asina kontratu ho kompañia atu konstrui edifísiu postu administrativu Maucatar, tarde iha prosesu BoQ hetan aprovasaun hosi nasionál. Ita hotu hatene tanba pandemia COVID-19 ne’ebé Governu implementa serka sanitária halo prosesu ne’e sai tarde,” nia dehan.
Tuir livru 3B Orsamentu Jerál Estadu (OJE) tinan 2021, Munisípiu Covalima prevee konstrusaun rezidénsia Administradór Munisípiu Covalima hamutuk $262,570 no konstrusaun Edifísiu Postu Administrativu Maucatar ho moru haleu hamutuk $179,438.
Jornalista : Celestina Teles
Editór : Cancio Ximenes
