Kompetitora ida konta istória tradisionál iha palkuu leten. Imajen Tatoli/Abílio Elo Nini

OÉ-CUSSE, 08 outubru 2021 (TATOLI)–Kedutaan Besar Repúblik Indonesia (KBRI) iha Timor-Leste liuhosi konsuladu iha RAEOA, sesta ne’e selebra ‘Bulan Bahasa’ hodi involve estudante nivél eskola sekundária tuir kompetisaun konta istória tradisionál nu’udár kooperasaun bilatérál ba setór edukasaun.

Reprezentante embaixada RI destakada iha RAEOA, Marya Onny Silaban, hateten serimonia kompetisaun konta istória tradisionál ho dalen maláiu ne’e, partisipa hosi estudante nivél sekundáriu sira iha sub-rejiaun Pante Makasar ne’ebé realiza hosi konsuladu iha Oé-Cusse.

Kompetitor/a sira hosi eskola sekundaria lima atu tuuir kompetisan. Imajen Tatoli/Abílio Elo Nini.

“Atividade ne’e esforsu hosi KBRI atu hametin relasaun bilateral iha setór edukasaun entre Timor-Leste ho Indonézia. Ami-nia foku mak atu dezenvolve dalen maláiu, hanesan dalen servisu nian iha Timor-Leste ne’ebé hakerek ona iha konstituisaun RDTL artigu 159, katak dalen maláiu nu’udar dalen servisu nian iha país ida-ne’e,” Marya Onny Silaban hateten ba Agência Tatoli iha edifisiu KBRI Oé-Cusse.

Atu dezenvolve globalizasaun sai intensivu, abilidade ko’alia dalen estranjeiru presiza aumenta, tanba ne’e Governu Indonézia fasilita juventude Timor-Leste espesiál iha RAEOA atu bele badinas no matenek ko’alia no hakerek lingua estranjeiru liu-liu dalen maláiu (Bahasa Indonesia).

“Ami espera katak, luhosi kompetisaun haktuir istória tradisionál ho dalen maláiu iha loron ohin, estudante sira iha Oé-Cusse bele sai di’ak liután, atu eleva sira-nia kompeténsia hodi bele kompete iha kampu servisu sai maduru liután,” nia dehan.

Sekretária Rejionál Asuntu Edukasaun no Solidariedade Sosiál no Inkluzaun, Avelina da Costa, hateten kompetisaun ne’e importante atu konta istória tradisionál, hodi hatene istória pasada nian.

“Ohin, ita hamutuk ho estudante sira mai partisipa iha kompetisaun atu selebra ‘bulan bahasa’, hanesan kooperasaun bilaterál entre Repúblika Indonesia ho Timor-Leste espesiál iha Oé-Cusse. Tanba ne’e mak autoridade apoiu programa ne’e no estudante sira mai hosi eskola sekundária lima iha sub-rejiaun Pante Makasar,” nia dehan.

Entretantu kompetitór/a ne’ebé partisipa iha kompetisaun konta istória ho lingua maláiu ne’e mai hosi Eskola Téknika Vokasionál Lifau, Escola Téknika Vokasionál Palaban, Eskola Sekundáriu Gerál Palaban, Eskola Katolika Sto. Antonio Oé-Cusse no Eskola Sekundáriu Gerál Baqui ho kompetitór hamutuk estudante na’in-15 kompostu hosi feto no mane.

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here