Provedór Adjuntu Boa Governasaun Direitu Umanu no Justisa, José Telo Soares Cristovão. Imajen Tatoli/Egas Cristovão

DILI, 07 outubru 2021 (TATOLI)- Provedória Direitu Umanu no Justisa (PDHJ, sigla portugés), ezekuta ona 63%, hosi Orsamentu Jerál Estadu (OJE) 2021, tuir Portál Transparénsia ne’ebé Agência Tatoli asesu, iha kinta ne’e.

Nune’e, gastu orijen $1,857,468,  kompromisiu  $133,673.84, obrigasaun $170,404.41, atuál $999,346.35 no saldu $554,043.40.

Provedor PDHJ  Interinu no atuál Adjuntu ba Área Governasaun Di’ak, José Telo Soares Cristovão hateten, rezultadu ezekusaun hosi orsamentu ne’e, haree iha monitorizasaun ba implementasaun Estadu emerjénsia, monitorizasaun  distribuisaun Cesta Básica, halo investigasaun ba kazu violasaun direitu umanu no boa governasaun hodi prodús relatóriu, akizisaun konkursu públiku  ba ekipamentu eletróniku, halo reabilitasaun edifísiu no sira seluk.

“Ezekuzasaun orsamentu PDHJ nian lao di’ak no garante sei ezekuta to’o hotu,” José Telo Soares Cristovão, hateten ba jornalista Agência Tatoli iha edifísiu PDHJ, Caicoli, ohin.

Tuir dotasaun OJE 2021 PDHJ pevee $1.857,468 hodi aloka ba saláriu vensimentu $863.786, bens serbisu $896.482, kapitál minór $97.200 no kapitál dezenvolvimentu ho transferénsia públika laiha.

Media prinsipál setoriál hosi PDHJ  2021 mak tuir papél ne’ebé maka, halo investigasaun, promosaun liuhosi treinamentu ba menbru PNTL, F-FDTL, funsionáriu públiku, guarda prizionál no halo fiskalizasaun simu keixa hodi halo rekomendasaun ho mós peskiza.

PDHJ prevee miliaun $1.5

Adjuntu ba Área Governasaun Di’ak, José Telo Soares Cristovão, hateten, iha OJE 2022 nian instituisaun ne’e hetan tetu inisiál milliaun $1.5, maibé ho orsamentu la sufisiente atu hala’o programa sira ne’ebé planea ona maka husu tan adisionál rihun $200-resin hodi prevee ba atividade  monitorizasaun ba eleisaun prezidensiál ne’ebé sei mai, akizasaun ekipamentu informátika,  saláriu funsionáriu foun  ne’ebé  hetan transferénsia  hosi  Ministériu Asuntu Parlamentar no Komunikasaun Sosiál (MAPKOMS) mai fali iha  PDHJ no sira seluk.

PDHJ ba tinan oin  kontinua tau prioridade tuir kna’ar ne’ebé mak iha hanesan halo monitorizasaun sira, simu keixa no halo investigasaun ba kazu violasaun direitu umanu no boa governasaun, formasaun menbru autoridade seguransa no militár.

Jornalista:Nelson de Sousa

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here