Vendedór ambulante fa’an hela sasán. Imajen/Espesiál

DILI, 07 outubru  2021 (TATOLI)—Ministériu Turizmu, Komérsiu no Indústria (MTKI) liuhosi Diresaun Nasionál Regula Atividade Komersiál halo ona levantamentu dadus ba negosiante ambulante iha Dili laran no konsege rekolla dadus provizóriu hamutuk 100-resin.

“Negosiante ambulante hanesan karrosa, sira ne’ebé fa’an iha resintu edifísiu públiku, inklui estrada ninin sira,” Diretór Nasionál Regula Atividade Komérsiu, Bertinetti Vieira Lobo Baptista, hateten iha ninia knaar fatin, Bebora, kinta ne’e.

Nune’e, Responsável atividade ne’e espera levantamentu ne’e bele ramata iha semana ida-ne’e nia laran.

“Parte diresaun iha polítika halo diagnóstika, nune’e bainhira to’o atividade nia rohan bele hatuur regra ruma hodi asegura sira-nia atividade tuir nia fatin,” nia akresenta.

Iha sorin seluk, Ministru Turizmu, Komérsiu no Indústria, José Lucas do Carmo da Silva, hateten, parte ministériu hahú halo esforsu hodi rejista negosiante ambulante sira ne’ebé maka hetan sofrimentu hosi situasaun pandemia COVID-19.

“Rejistu ba negosiante sira iha Dili nu’udar programa ministériu ninia, nune’e bele hatene dadus negosiante hira ne’ebé afeta ba iha situasaun COVID-19 no hira maka kontinua sira-nia atividade negósiu iha situasaun ne’e,” nia dehan.

Tuir Ministru, MTKI sei apoia  negosiante sira liuhosi programa kréditu suave ne’ebé daudaun parte ministériu implementa ona.

Notísia relevante: MTKI transfere fundu $900.000 ba BNCTL implementa garantia kréditu sosiál

“Insentiva negosiante sira momentu ne’ebá ami halo ona, liuhosi kréditu suave ne’ebé dedika duni ba sira hodi asesu ba kréditu, maibé kréditu suave ne’e iha nia kritériu, la’ós ema hotu bele hetan maibé liuhosi prosesu ida,” governante ne’e esplika.

Jornalista : Natalino Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here