Ministru Edukasaun Joventude no Desportu (MEJD), Armindo Maia. Imajen TATOLI/Francisco Sony

DILI, 07 outubru 2021 (TATOLI)-Ministru Edukasaun Juventude no Desportu (MEJD), Armindo Maia, husu ba profesór sira atu kompensa filafali matéria ne’ebé mak la konsege hanorin ba estudante sira durante implementasaun Estadu Emerjénsia antes hala’o ezame nasionál iha meadu fulan-dezembru 2021.

“Falta de’it fulan rua estudante sira hala’o ezame, ha’u husu ba mestre sira favór aproveita fulan rua ne’e hodi rekopera fali matéria ba estudante sira,” Governante ne’e hateten bainhira hala’o vizita bá eskola ensinu bázika sentrál 10 Dezembru Comoro Dili, ohin.

Ministru ba área edukasaun ne’e, rekoñese prosesu aprendizajen ba estudante sira hahú husi nivél pre-eskolár to’o universidade sira durante fulan barak nia-laran atrazadu tanba impaktu husi problema pandemia globál COVID-19.

Maibé tuir nia, daudaun ne’e estudante sira bele hahú prosesu aprendizajen prezensiál tanba Governu levanta ona desizaun kona-ba implementasaun serka sanitária no konfinamentu obrigatóriu iha Timor-Leste relasiona ho númeru pasiente COVID-19 pozitivu menus ona ba 300-resin.

“Ha’u ejize ba mestre sira atu hatudu sira-nia responsablidade ba estudante sira, tanba durante hela iha uma mós mestre sira simu hela saláriu. Tanba ne’e, mestre sira tenki tau hamutuk forsa hodi rekopera tempu no matéria sira ne’ebé lakon ona,” nia hateten.

Ministru Armindo Maia hatutan, pelumenus profesór sira hanorin matéria ne’ebé maka la konsege hanorin ba estudante sira atinje to’o pursentu 80, maski la atinje to’o 100%, antes to’o iha data ezame nasionál no ezame periodu datoluk iha tinan 2021.

“Husu mestre sira atu tau matan ba estudante sira, favór kontrola alunu sira atu fase liman, uza máskara molok tama iha aula. Ho maneira ida ne’e de’it maka bele halakon moras COVID-19 iha Timor-Leste,”nia dehan.

Jornalista : Tomé Amado

Editór        : Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here