DOC broiler (manu oan) ne’ebé mate iha Fronteira Terrestre, bainhira tarde simu atendimentu hosi Alfándega. Imajen/FB

DILI, 07 outubru 2021 (TATOLI)–Autoridade Aduaneira (AA)/Alfándega komprometidu sei hadi’a sistema atendimentu ba sasán importadu ne’ebé ho risku maka’as, hosi kualker via tama mai territóriu nasionál.

Komisáriu AA, José António Fátima Abílio, rekoñese akontesementu foin lalais iha fronteira Batugade, ne’ebé fó impaktu ba sasán importadu hanesan DOC (Day Old Chick) Broiler (manu-oan) balun mate tanba tarde iha atendimentu, tanba ne’e parte Alfándega sei haree frakeza sira bainhira simu sasán, liuliu iha fronteira terrestre Batugade, ne’ebé iha movimentu sasán no ema barak.

“Ha’u simu mensajen kona-ba preokupasaun ne’e, ha’u lee ona mensajen ne’e no ha’u kontaktu kedas ba diretór iha Batugade. Razaun katak sistema ladún di’ak, ahi eletrisidade ladi’ak no ha’u mós informa katak tenke forma ekipa auditoria interna hodi halo investigasaun kauza hosi akontesementu ne’e, maibé ha’u mós hasai ona karta ida ba Diretór iha Fronteira Batugade no Salele, relasiona ho kompañia sira hetan kapitál investimentu liuliu ba sistema down ka eletrisidade la normál, karik tenke halo atendimentu manuál de’it, atu lori hasai lalais tiha tanba DOC ne’e laiha fatin apropriadu, tanba ne’e maka rai manas afeta manu broiler oan mate molok to’o fatin destinasaun,”Komisáriu AA klarifika ba Agência TATOLI, iha ninia knaar fatin, kinta ne’e.

Responsável ne’e mós preokupa, katak loloos ne’e fó oportunidade investimentu lokál sira hodi bele moris, nune’e redúz dependénsia ba sasán importadu.

Ha’u foti ona medida katak tenke tau atensaun ba kestaun sira-ne’e. DOC broiler tama iha fronteira iha dadeersan tuku 10 no lorokraik tuku 14:00 mak hasai, akompaña ho klima, entaun DOC sira ne’e balun mate,” nia haktuir.

Sorin seluk, Diretor empreza Cladotia FU, Rui Castro, kestiona ho atendimentu servisu Alfándega, ne’ebé difikulta ba sira-nia negósiu no tenke lakon orsamentu hamutuk $40.000.

“Problema agora la’ós inspesaun, tanba inspesaun ne’e haree ho matan, dokumentu hosi ne’ebá iha, no dokumentu kuarentena mós iha ne’ebé ninia kuantidade ne’e iha, loloos ne’e autorizasaun ba negósiu la’o daudaun, prosesu dokumentu ne’e bele ikus no autoriza ona DOC ne’e sai hosi fatin refere. Problema ne’e akontese bebeik ona, ne’e la’ós problema ahi mate, ahi mate ne’e razaun tentativa de’it”, Emprezáriu nasionál ne’e kestiona.

Emprezáriu timor-oan ne’e dehan, odamatan fronteira loke dadeer tuku 10:00 otl, karreta halai mai neneik no lori prosesu.

“Sira la fó prioridade sira hodi fó atendimentu hanesan de’it, entaun hein to’o meiu-dia tuku 12:00 no funsionáriu sira tenke han meiu-dia, no tama fali iha lorokraik tuku 14:00, hafoin lori sei selu tan iha banku kuaze oras ida, problema sira-nia atendimentu mak nune’e, la’ós dehan ahi mate,” nia akresenta.

Maski nune’e, tuir Rui Castro, parte kompañia nafatin selu taxa bazeia ba kuantidade.

“Sira haree kuantidade no taxa ne’e kontinua selu, ezemplu manu ne’e 11.000, tenke selu nafatin. Sira la preokupa manu mate, maibé sira nafatin haruka selu. Servisu kuarentena di’ak tebes maibé servisu alfándega mak tarde. Sira loloos tenke tau prioridade ba sasán sira ne’ebé ho risku maka’as ne’e atende uluk, dokumentu sira ne’ebé presiza trata ikus importante sasán tenke sai ona,” Rui Castro kestiona.

Entretantu, iha loron kuarta (29/09) akontese iha fronteira Batugade, karreta ne’ebé tula sasán hanesan DOC broiler para kleur iha fronteira, nune’e impaktu balun mate.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here