Médiku-sira prepara hela vasina hodi oferese ba komunidade. Imajen Tatoli/António Gonçalves.

BOBONARO, 05 outubru 2021 (TATOLI)- Taxa kobertura vainasaun iha postu admininistrativu Calilaco, munisípiu Bobonaro, sa’e ba 66,4%.

“Ho prezensa hau nia ita konsege hasa’e taxa kobertura vasinasaun hosi doze primeiru 2.726 Sae ba 2.781 total 66,4% no doze segundu 766 sae ba 826 total 19,7%,” Ministru ensinu superior siénsia no kultura (MSSK), Longuinhos dos Santos ba jornalista sira, hafoin halo lansamentu kampaña vasinasaun iha, Suku Manapa, Postu administrativu Cailaco, tersa ne’e.

Total Populasaun Postu administrativu Cailaco, hosi idade 18 ba leten ho komorbilidade ne’ebé elijível atu simu vasina hamutuk 4.182.

“Hosi númeru ne’e sei falta ema na’in 1.115 mak seidauk simu vasina tanba ne’e mak ita esforsu serbisu ho autoridade lokal sira, fahe informasaun para komvense sira mai simu hotu vasina,” Ministru ne’e dehan.

Governante ne’e observa partisipasaun komunidade nian másimu, maibé, tuir nia, atu hasa’e tan kobertura vasinsaun presiza kontribuisaun maka’as hosi administradór postu no lider komunitáriu suku ualu nian nune’e bele ajuda Governu atinje meta katak populasaun Timor-leste 80% tenke simu vasina kompletu.

“Se ita vasina kompletu hotu ona signifika komunidade bele movimentu livre atu halo sira-nia atividade ekonimia, relijioza no kultura no atu kontribui ba oan sira-nia eskola,” Nia dehan

Durante halo sosializasaun kampaña nasional vasinasaun Covid-19 iha Cailaco,Ministru ensinu superiór siénsia no kultura partila informasaun kona-ba vizaun no misaun Estadu no Governu nian atu proteze populasaun hosi pandemia Covid-19, esplika importánsia, kualidade no efeitu hosi vasina AstraZeneca. Alende ne’e, konvense mos komunidade, evita konsumu informasaun hoax (bosok) ne’ebé ema iresponsável lansa iha media sosiál.

“Ha’u ema Bobonaro-oan, mai esplika ba sira agora sira mos komprende. Ita haree partisipasaun komunidade Cailaco nian másimu ona tanba durante ne’e informasaun Hoax mak domina liu sira nia kakutak,” Nia esplika.

Tuir planu Ministru ensinu superiór siénsia no kultura ,durante loron sia nia laran sei halo kampaña vasinasaun kobre suku ualu, no aldeia 22 iha postu administrativu Cailaco, hodi motiva no enkoraza komunidade, simu vasina hodi proteze an hosi kontajiu Covid-19.

Iha biban ne’e, Xefe Suku Manapa, Jeferino Loco Bere agradese ho prezensa membru governu iha sira-nia leet tanba bele fahe informasaun loloos ba komunidade hodi motiva sira partisipa  másimu iha programa  Governu nian.

Lider komunitáriu ne’e haktuir, totál populasaun Manapa ne’ebé alvu atu simu vasina hamutuk 659. Hosi númeru ne’e na’in 476 simu ona no falta 192 mak seidauk simu vasina.

“Hau fiar katak ho prezensa ministru ensinu superior ninian,  komunidade bele simu hotu ona vasina kompletu tanba lori ona informasaun loloos ba sira,” Nia dehan.

Nia hateten, antes ne’e, iha komunidade balun lakoi simu vasina tanba la hetan informasaun klaru kona-ba importánsia no efeitu hosi vasina maibé rona informasaun dehan katak membru governu atu sosializa informasaun iha suku no aldeia, komunidade Voluntariamente mai iha sentru vasinasaun simu vasina hodi proteze an hosi transmisaun Covid-19.

Jornalista: Sérgio da Cruz

Editor: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here