Membru foun F-FDTL aprezenta an iha Kuartél Jenerál Fatuhada, molok hakat ba integra an iha Sentru Formasaun no Treinu Metinaro, segunda (27/09). Imajen Tatoli/Francisco Sony.

DILI, 06 outubru 2021 (TATOLI)-Membru foun FALINTIL-Forsa Defeza Timor-Leste (F-FDTL) na’in ida, mane hosi munisípiu Lautem, ne’ebé inkorpora ona iha komponente Sentru Formasaun no Treinu Metinaro iha loron 27  setembru hodi submete ba formasaun militár durante fulan neen husu  rejignasaun, tanba la toman ho sistema militár.

“Hau rona ida maka deziste, tanba la toman no la aguenta sistema militár, husu nia rejignasaun. Nune’e ha’u sei hasai diretiva ida ba rekrutamentu hotu-hotu dentru loron 30 ema labele deziste, maibé hafoin loron tolunulu ba leten sei iha de’it ona militár nia laran no ita labele mai halimar fali ho instituisaun ohin tama aban sai hanesan ne’e ladun di’ak,” Xefe Estadu Maiór F-FDTL, Tenente Jenerál Lere Anan Timur, ba jornalista sira hafoin sorumutu ho Prezidente Repúblika (PR), Francisco Guterres Lú-Olo, iha edifísiu Palásiu Prezidensiál Bairru Pite, kuarta ne’e.

Hatan kona-ba membru ne’e impede oportunidade ema seluk nian, Lere Anan Timur, hateten la konsidera hanesan militár  maibé tama voluntáriu sai voluntáriu, ne’e lisaun ida ba joven sira seluk. Sé maka labele rekuza kedas, labele mai okupa fali ema seluk nia fatin.

“Maibé seidauk to’o fulan ida no instrusaun seidauk la’o, nune’e bele avansa fali ida kompleta fali membru 600 ne’e,” nia dehan.

Jenerál Lere Anan Timur durante sorumutu relata mós ba Xefe Estadu kona-bá prosesu rekrutamentu membru foun ne’ebé inkorpora ona iha instituisaun, daudaun iha Metinaro hodi tuir formasaun ne’ebé komesa simu uniforme to’o agora la’o di’ak.

Ko’alia mós ho PR kona-ba fó seguransa iha liña fronteira terrestre ne’ebé instituisaun F-FDTL ho Polísia Nasionál Timor-Leste (PNTL) kontinua asegura.

Xefe Estadu husu atu haree didi’ak disiplina membru F-FDTL kona-ba sira-nia responsabilidade halo oinsá kumpre misaun nu’udar lutu nasaun nian.

Hasai membru na’in rua

Hatan ba preokupasaun membru na’in rua ne’ebé antes ne’e komisaun rekrutamentu elimina hosi lista, Lere Anan Timur dehan,  institusaun iha kritéra balun ne’ebé atu tama militár ema  ne’ebé  tenke ho sinseru, onestidade, leadade nune’e komandu deside  elimina membru na’in rua tanba iha problema pasadu no nu’udar membru arte marsiál maibé la deklara an.

Tanba ne’e, nia hateten, ho kritéria sira ne’ebé iha nune’e ema ne’ebé atu sai militár tenke sukat nia nasionalizmu no patriotizmu.

Notísia relevante:Membru F-FDTL foun 600 inkorpora ba komponente formasaun Metinaro

Jornalista  :Nelson de Sousa

Editór        : Rafy Belo

PUBLISIDADEiklan