Kondisaun Eskola Bázika Filiál Santa Teresinha Quelicai grave. Imajen TATOLI/Joanico de Araújo.

DILI, 06 outubru 2021 (TATOLI)-Ministériu Edukasaun Juventude no Desportu (MEJD), kuarta ne’e, asina ona nota kooperasaun ho Banku Nasionál Komérsiu Timor-Leste (BNCTL-sigla portugués) hodi ezekuta orsamentu  millaun $20-resin ba projetu infraestrutura bázika hamutuk 204.

Diretora Jerál Polítika Planu no Inkluzaun MEJD, Odilia das Dores UNG Martins hateten orsamentu ba projetu ne’e maihosi item tranferénsia públika hodi hadi’a sala aprendizazén hamutuk 204.

Iha inísiu MEJD planea konstrui  eskola hamutuk 196 ho sala 564, maibé projetu ne’e aumenta ba 204 ho sala aprendizazén 657 tanba propoin husi Ajénsia Dezenvolvimentu Nasionál.

“Loloos ita mantein ho eskola 194 tanba hetan observasaun hosi ADN ne’e duni númeru eskola aumenta bá 204 ho sala aula 657,” nia hateten bainhira asina MoU ho Diretór Ezekutivu BNCTL, Brígidio de Sousa iha salaun MEJD Villa-Verde Dili.

Iha fatin hanesan Ministru Edukasaun Juventude no Desportu, Armindo Maia, hateten akordu ne’e, atu BNCTL halo transferénsia orsamentu ba konta bankaria kada grupu komunitária hodi hahú implementa projetu ne’e.

“Ha’u fiar BNCTL sei ejerse  orsammentu Millaun $20-resin ne’e ho didiak atu ita-nia grupu komunitáriu sira konstituidu mai halo levantamentu karik sira bele trata ho didiak atu labele mosu burokrasia demais,” nia hateten.

Governante ne’e fiar katak ho akordu ne’e, BNCTL sei aselera prosesu transferénsia orsamentu ba  kada grupu komunitáriu nune’e bele hahú ezekuta ona projetu konstrusaun iha área edukasaun ne’e.

Nune’e mós Diretór Ezekutivu BNCTL, Brígidio de Sousa hateten nia parte sente apresia ho programa governu nian atu hadi’a infraestrutura bázika iha eskola públika sira iha territóriu Tiimor-Leste.

“Ita iha kapasidade atu apoiu MEJD tanba ita iha sukursal iha munisípiu hotu inklui RAEOA tanba ne’e ami prontu apoiu saida de’it maka Governu husu,” nia dehan.

Jornalista : Tomé Amado

Editór        : Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here