Ministru Agrikultura no Peska, Pedro dos Reis, -Ministru Turizmu, Komérsiu no Indústria, Domingos Lopes Antunes inklui Embaixadór Nova Zelandia, Philip Hewitt, hetan esplikasaun hosi ekipa sentru hakiak ikan, hafoin lansamentu sentru fini ikan Tilápia iha suku Parlamentu, tersa (05/10). Imajen TATOLI/Natalino Belo

LAUTÉM, 05 outubru 2021 (TATOLI)—Institutu Peskiza, WorldFish Timor-Leste harii sentru fini ikan tilápia iha suku parlamentu, postu Lautém, munisípiu Lautém, ho objetivu hakarak kontribui hadi’a nutrisaun iha Timor-Leste.

“Espera iha tempu tuir mai ita bele kontinua halo lansamentu iha fatin balun, ho objetivu atu responde ba ita-nia planu estratéjiku dezenvolvementu iha setór aquikultura ne’ebé difine katak ita tenki hasa’e per kapita konsume hahán ikan no hadi’a nutrisaun, inklui bele kontribui ba seguransa nutrisaun ka alimentár iha nasaun,” Reprezentante nasionál WorldFish Timor-Leste, Mario Pereira, hateten, iha ámbitu lansamentu sentru fini ikan, iha suku Parlamentu, tersa ne’e.

Worldfish hahú halo asisténsia ba fatin sentru fini ikan tilápia ho modelu parseria públiku-privadu (PPP) iha suku Parlamentu, iha fulan-novembru to’o abril 2019.

Hahú konstrusaun infraestrutura bazika hanesan uma no kolam, inklui ekipamentu seluk ne’ebé nesesita ba sentru viveiru ikan, nune’e iha maiu 2020 hahú halo produsaun dahuluk.

Sentru ne’e iha kapasidade prodús fini ikan hamutuk 85.000 to’o 120.000 kada fulan, ne’ebé orsamentu investimentu hosi WorldFish hamutuk $15.000 no Black Bird $15.000, ho totál orsamentu $30.000.

Worldfish hetan fundu hosi Governu Nova Zelándia liuhosi Embaixada iha Timor-Leste.

“Investimentu la boot, maibé futuru mai sei asegura sustentabilidade ba inisiativa ida-ne’e,” nia akresenta.

Sentru ne’e distribui fini ikan ba sentru Leste hanesan munisípiu Baucau, Viqueque no Lautém rasik, ne’ebé kada fulan grupu ikan sosa 200.000 resin ho kustu $1.000 to’o $2.000.

Iha fatin hanesan, Ministru Agrikultura Peska, Pedro dos Reis, hateten, parte ministériu iha kompromisu hakarak promove aquikultura ba futuru no ministériu rasik iha ona sentru fini ikan hamutuk haat hanesan, Leohitu, postu Balibo, munisípiu Bobonaro, Loihunu iha Viqueque, Covalima no Lautém.

“Ne’e hatudu katak nafatin kompromisu halo produsaun ikan, nune’e bele aumenta volume ikan,” Ministru hatutan.

Governante ne’e husu atu grupu fini ikan sira aproveita oportunidade ho didi’ak no bainhira falta informasaun tékniku ruma, nafatin konsulta ho servisu tékniku Agrikultura munisipál no nasionál atu buka solusaun.

Nune’e mos, Jestór Black Bird, Cesar Nunes, agradese ba Worldfish tanba bele ajuda finansia no introdús métodu atu hakiak fini ikan, nune’e parte kompañia rasik nafatin esforsu-an atu aumenta tan esperiénsia no produsaun iha futuru.

Seremónia lansamentu sentru fini ikan partisipa mós hosi Vise-Ministru Turizmu, Komérsiu no Indústria, Domingos Lopes Antunes, Administradór munisípiu Lautém, Domingos Sávio, Embaixadór Nova Zelándia iha Timor-Leste, Philip Hewitt, Autoridade lokál, inklui konvidadu no komunidade suku Parlamentu.

Jornalista : Natalino Belo

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here