Logo Ministériu Públiku. Imajen Tatoli/Francisco Sony

DILI, 05 outubru 2021 (TATOLI)- Ministériu Públiku (MP), durante iha fulan setembru tinan ne’e, rejista prosesu kazu tama foun hamutuk 483.

Prokuradór Jerál Repúblika (PJR), Alfonso Lopez hateten, iha 01 agostu to’o 15 setembru majistradu prokuradór iha féria judisiál atende de’it prosesu kazu urjente hanesan primeiru interrogatóriu, arguidu prezu.

Iha 16 setembru atividade lao normal hanesan investigasaun no julgamentu. “Nune’e durante setembru kazu entrada 483, prosesu findu ka temina akuza no arkiva iha nivel nasionál 393, no kazu sira ne’e ho tipu hanesan maioria númeru bo’ot ofensa integridade fizíka simples no grave, violénsia doméstika, abuzu seksuál ba menór, krime dezobidénsia,”  Alfonso Lopez hateten ba jornalista sira hafoin ramata sorumutu ho Prezidente Repúblika, Francisco Guterres ‘Lú-Olo’, iha edifisiu Palasiu Prezidensiál, Aitarak Laran, tersa ne’e.

Entre prosesu findu (prosesu ne’ebé termina ona iha nível Ministériu Públiku hosi halo akuzasaun no arkiva) maka akuzadu 214, prosesu arkiva 179 nune’e dadaun iha pendente 3112.

Mezmu iha fulan agostu prokuradór sira iha féria no prosesu kazu  kontinua tama nafatin.

“Fulan agostu rejista prosesu 370 tanba ne’e númeru prosesu aumenta iha ida ne’e” Nia dehan.

Aliende iha Gabinete Sentrál Kombate Korrupsaun no Krime Organizadu (GSKKKO) iha kazu pendente atuál 217 no prosesu tama 16, konsege termina akuza no arkiva 16.

Tuir dadus hosi prosesu kazu sira iha nivel distritál Prokuradória Dili númeru prosesu barak liu iha meiadu fulan setembru ne’e prosesu tama 312, konsege termina 219 no pendente 2266.

Prokuradória distritál Baucau, kazu tama foun 76, prosesu termina 75 no pendente 389.
Prokuradória Suai, prosesu tama 56,termina 55 no pendente 159.

Prokuradória Óe-cusse iha prosesu tama foun 23, termina 30 no pendente atuál 82.

Jornalista:Nelson de Sousa

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here