Traballadór sira ezekuta hela obra Estadu iha terrenu. Imajen TATOLI/António Gonçalves

DILI, 05 outubru 2021 (TATOLI)—Ministériu Obra Públika (MOP) rejista projetu konkursu públiku ho tipu Request for Quotation (RfQ) ongoing (iha prosesu nia laran) hahú hosi tinan 2019 to’o 2021 hamutuk 328.

“Tinan 2019 to’o 2020 hamutuk iha kontratu 152 no projetu foun iha tinan 2021 hamutuk kontratu 176,” Diretór Nasionál Aprovizionamentu MOP, Quintiliano Afonso Belo, hateten ba Agência TATOLI, iha ninia knaar fatin, Caicoli, tersa ne’e.

Kontratu ongoing hahú tinan 2019 to’o 2020 fahe ba projetu sira hanesan estrada rurál, manutesaun nasionál no retensaun balun, ne’ebé aloka iha  kapitál dezenvolvimentu, hahú ho valór kontratu hosi $5.000 to’o $100.000 hamutuk kontratu 37 no valór liu $100.000 hamutuk kontratu 34.

Nune’e mós, ongoing sira iha bens no servisu alokadu ba estudu Dezeñu Enjeñeiru Detalladu (DED) ba estrada hamutuk pakote 12, kompostu hosi ponte hamutuk pakote 10 no estudu sira seluk inklui mós servisu manutensaun estrada nasionál no retensaun sira ne’ebé ho valór hahú $5.000 to’o $100.000 hamutuk kontratu 38 no valór liu $100.000 ho kontratu 43.

Notísia relevante: Tender 36 iha R4D Fó Oportunidade Ba Empreza Lokál

Diretór Nasionál ne’e informa, iha tinan 2021, Diresaun Nasionál Aprovizionamentu (DNA) konsege selebra kontratu foun iha kategoria kapitál dezenvolvimentu, liuliu ba  projetu estrada rurál ba dezenvolvimentu (R4D, sigla inglés) no manutensaun estrada nasionál sira ho valór hahú hosi $500 to’o $100.000 hamutuk kontratu 21 no  valór liu $100.000 hamutuk  kontratu 47.

Enkuantu, iha kategoria bens no  servisu,  DNA konsege selebra ona kontratu sira hanesan normalizasaun infraestrutura kauza dezastre naturál iha loron 04 abríl no house keeping sira hanesan manutensaun karreta, mina operasionál no kontratu kiik hahú hosi valór $500 to’o $100.000 hamutuk kontratu 78 no valór liu $100.000 hamutuk kontratu sia.

Aleinde ne’e,  MOP mós hetan alokasaun oituan iha kategoria kapitál menor, nune’e DNA konsege selebra kontratu hahú  hosi valor $500 to’o $100.000 hamutuk kontratu 18 no valór liu $100.000 hamutuk kontratu ualu.

Tuir Diretór Quintiliano, kontratu hirak ne’ebé selebradu hosi Diresaun Jerál Administrasaun no Finansan (DGAF, sigla portugés), Diresaun Nasionál Obra Públika (DNOP) no DNA konsege halo pagamentu tuir natureza alokasaun orsamentu ne’ebé la hein rekomendasaun pagamentu hosi Ajénsia Dezenvolvimentu Nasionál (ADN).

Kona-ba kontratu ne’ebé ho nia natureza tenke iha rekomendasaun hosi ADN, DNA-MOP sei prosesa bainhira iha rekomendasaun pagamentu no sertifikadu pagamentu, ho progresu no servisu obra ne’e rasik.

“Ami fiar katak iha tempu badak sei hetan sertifikadu pagamentu hosi projetu nia-na’in no rekomendasaun hosi ADN hodi ami prosesa tuir kalendáriu orsamentu ne’ebé hakerek ona iha Dekretu Governu,” nia akresenta.

DNA-MOP mos husu atu konsidera nafatin planifikasaun sira ne’ebé orsamenta ona iha tinan 2022 no bele hetan aprovasaun hosi polítiku sira  hodi bele selu projetu hirak ne’ebé konsege selu iha tinan 2021 no bele kontinua lori hodi selu kontratu sira iha tinan 2022.

“Ami sei esforsu nafatin aselera pagamentu sira ba kontratu hirak ne’ebé estabelesidu, nune’e MOP bele hetan ezekusaun ne’ebé di’ak iha tinan ne’e nia rohan, ho kualidade bazeia ba orientasaun hosi Ministru Obra Públika,“ Diretór otimista.

Jornalista : Florêncio Miranda Ximenes

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here