Vise Primeiru Ministru no mós Ministru Planu no Ordernamentu, José Maria dos Reis halo hela esplika ba Komunidade Beto Tasi Dili hodi simu vasina.Imajen/Tatoli Arminda Fonseca.

DILI, 04 outubru 2021 (TATOLI)-Vise Primeiru Ministru no mós Ministru Planu no Ordernamentu, José Maria dos Reis, husu ba komunidade  sira iha aldeia Beto Tasi Suku Madohi Postu Administrativu Don Aleixo atu simu vasina hodi hasa’e imunidade ema-nian ba prevensaun COVID-19.

José Maria dos Reis hato’o pedidu ne’e bainhira halo abertura kona-ba kampaña vasina loron 10 ne’ebé hala’o iha Aldeia Beto Tasi, segunda ne’e.

“Ha’u atu hateten katak laiha Governu ida mak atu oho nia povu, tanba ne’e husu ba komunidade hotu-hotu partisipa vasina tanba vasina importante tebes ba ita atu hametin ita-nia isin loloon hodi kombate moras COVID-19, bainhira ita simu ona vasina sai hanesan lutu ba ita-nia aan rasik, hodi kontra COVID-19 iha ita-nia Rai,” Governante ne’e hateten.

Provizoriamente, nia dehan to’o oras ne’e mundu seidauk deskobre ai-moruk hodi kura COVID-19 maibé iha de’it maka vasina atu hasa’e imunidade ema-nian ba  prevene transmisaun moras corona.

Durante ne’e populasaun barak maka la kontribui hodi simu vasina tanba sei fiar boatus ne’ebé espalla iha públiku nia leet dehan vasina la seguru bae ma nia saúde no oho ema nia vida.

Iha fatin hanesan Diretora Saúde Munisípiu Dili, Agostinha Segurado relata totál populasaun Dili hamutuk 213.800 maka tama iha kategoria atu simu vasina no husi númeru ne’e ema na’in 168.288  ho pursentajen 78.9(%) maka simu ona vasina doze dahuluk no doze daruak pursentu 68.8.

“Ohin aumenta tan porsentu hanoin munisípiu Dili presiza tan 18%  atu kompleta 80% mak hela ema na’in 47.00 bele atinje 80%,” nia hateten.

Nune’e mós komunidade Marcolino Soares hateten prontu simu vasina tanba konvensidu ho informasaun ne’ebé maka sensibiliza husi Governu no parte saúde  durante kampaña vasina ne’ebé aprezenta husi Governu no mós parte saúde nian.

“Ohin ha’u foin rona informasaun loloos hosi ita-nia membru, ha’u simu vasina sente baibain hela, tanba ne’e ho liafuan ne’ebé ohin ha’u rona, ha’u sei hatutan ba família nune’e hotu-hotu bele partisipa simu vasina,” nia hateten.

Jornalista: Arminda Fonseca           

Editór : Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here