Prezensa membru Governu na’in-haat iha lansamentu kampaña vasinasaun iha Baucau, iha CCD, Villa-antiga, segunda (04/10). Imajen TATOLI/Natalino Belo

BAUCAU, 04 outubru 2021 (TATOLI)–Ministru Petróleu no Minerál (MPM), Víctor da Conceição Soares, urgullu ho progresu partisipasaun komunidade Baucau ba kampaña vasinasaun prevensaun COVID-19.

“Ha’u orgullu tanba Baucau agora atinje ona 57,1%, ida-ne’e mais de metade, ne’e orgullu ida mai ha’u hanesan Baucau-oan ne’ebé presiza ita-nia onra no respeitu perante Estadu,” Ministru hateten iha Sentru Konvensaun Baucau (CCB, sigla portugés), Villa-antiga, segunda ne’e.

Membru Governu haat kompostu hosi Ministru Petróleu no Minerál, Víctor da Conceição Soares, Ministru Turizmu Komérsiu no Indústria, José Lucas do Carmo da Silva, Vise-Ministru Admistrasaun Estatál, Lino de Jesus Torrezão no Vise Ministru Obra Públika, Nicolau Lino Freitas Belo, hamutuk ho Prezidente Autoridade Munisípiu (PAM) Baucau, Olívio ‘Bou-Lesa’ Freitas, inklui autoridade lokál, halo lansamentu kampaña vasinasaun períodu daruak iha Baucau, ho objetivu atu aselera kampaña vasinasaun durante semana-rua.

Prezensa membru Governu sira iha Baucau, hakarak hamutuk ho autoridade munisipál no postu, xefe suku no xefe aldeia sira, hodi tama sai uma atu kombate lia bosok ka hoax kona-ba vasina.

“Ohin lansa, aban ita bele arranka ona ba baze, konforme líder komunitáriu atu ba konsentra ko’alia ho komunidade ka diálogu ka door to door, ne’e mak durante ne’e la fiar bele konfronta ho ami atu ko’alia tanba iha mundu ida terseiru milénium ho teknologia transparente sei iha ema lori lia bosok tun sae,” nia akresenta.

Iha fatin hanesan Ministru Turizmu Komérsiu no Indústria, José Lucas do Carmo da Silva, hateten, prezensa membru Governu sira iha baze, bazeia ba orientasaun Primeiru-Ministru, ne’ebé hakarak tau esforsu hamutuk atu kombate COVID-19 iha Timor-Leste.

Notísia relevante: PM orienta membru Governu hala’o kampaña vasinasaun iha territóriu nasionál

“Ita tau esforsu hamutuk, atu luta kontra COVID-19, tanba ne’e ami na’in hirak mai atu kompleta de’it saida mak na’in hirak halo ona, reforsa, hametin no kompleta de’it buat kiik-oan balun, la’ós barak,” Ministru hatutan.

Iha biban hanesan, Diretór Servisu Saúde Munisípiu Baucau, Domingos Reinaldo Guterres, informa, hahú abríl to’o semana dahuluk outubru, sidadaun ne’ebé simu ona vasina AstraZeneca hamutuk 58%, enkuantu populasaun ne’ebé seidauk simu vasina hamutuk 31.439.

Tuir dadus hosi servisu saúde munsipál, iha Baucau, ema ne’ebé foin simu vasina doze dahuluk 57,1 % no doze daruak 29,2%, hosi totál populasaun 72.000 resin.

Jornalista : Natalino Belo

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here