Estudante sira hahú tama eskola tanba Edukasaun RAEOA re-ativa hikas aula prezensiál. Imajen TATOLI/Abílio Elo Nini.

OÉ-CUSSE, 04 outubru 2021 (TATOLI)—Autoridade RAEOA liuhosi Sekretáriu Rejionál Asuntu Edukasaun no Solidáriedade Sosiál no Inkluzaun aloka $40.799.50 apoiu estudante sira hosi Orsamentu Jerál Estadu (OJE) 2021 ba pagamentu faze daruak nian iha tinan 2021 ne’e.

Diretór Edukasaun RAEOA, Daniel Mauno, hateten tanba presiza nesesidade urjensia ba eskola sira, entaun autoridade deside entrega fundu ne’e direta ba kada eskola sira, nune’e sira bele jere rasik tuir nesesidade eskola nian.

“Ohin, ita hahú halo halo pagamentu osan ba apoiu estudante sira faze daruak, tanba eskola sira submete ona relatóriu. Tanba faze daruak ne’e halo ho pakote ida de’it, eskola hotu-hotu obrigatóriu hatama relatóriu kompletu ona mak foin ba halo pagamentu,” Daniel Mauno informa ba Agência Tatoli, iha salaun Edukasaun Santa Rosa, Oé-Cusse, segunda ne’e.

Pagamentu ne’e hanesan pagamentu ba primeiru faze ne’ebé realiza iha fulan-maiu liubá, no montante fahe osan ba apoiu estudante sira-ne’e bazea ba totál estudante sira iha eskola no bazea lei pagamentu osan apoiu ba estudante sira-nian.

“Ba Ensinu Sekundária Jerál kada estudante 0,50 sentavós, Ensino Báziku $1, Eskola Tékniku Vokasionál $1 no pré-eskolár 0,75 sentavós,” nia informa.

Nia husu ba dirijente eskola sira iha RAEOA, atu maneja orsamentu ne’e bazea ba livru manuál osan ba apoiu estudante nian, nune’e uza fundu ne’e tuir nesesidade eskola no bele garante kualidade implementasaun ba prossu aprendizajen.

Diretór Eskola Secundário Gerál, Domingos Ramos Anunu, agradese ba autoridade RAEOA tanba asegura pagamentu antes, nune’e bele halo preparasaun ba ezame nasionál no ezame pasajén.

“Autoridade mak tenke iha regulamentu forte atu haka’as responsavel eskola sira tenke hatama relatóriu lalais. Tanba, ami eskola barak hatama uluk maibé eskola rua-tolu mak mak atraza entaun fó implikasaun ba eskola sira hotu halo preparasaun ba ezame sira tuir mai,” nia dehan.

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here