Traballadór EDTL halo instalasaun eletrisidade iha área Comoro, kinta (04/03). Imajen TATOLI/António Gonçalves

DILI, 03 outubru  2021 (TATOLI)–Administradór munisípiu Manufahi, Arantes Isaac Sarmento, informa, daudaun ne’e iha suku 15 iha Manufahi ne’e mak seidauk asesu ba liña eletrisidade.

“Iha munisípiu Manufahi iha suku hamutuk 29, maibé suku 15 maka seidauk asesu ba eletrisidade,” Autoridade munisipál ne’e dehan ba Agência TATOLI, foin lalais ne’e, iha Hotel Timor.

Antes ne’e, Eletricidade de Timor-Leste, Empreza Públika (EDTL, E.P) loke konkursu eletrifikasaun nasionál hamutuk pakote 30 iha suku 33, hosi totál suku 76 iha territóriu nasionál ne’ebé seidauk asesu, ne’ebé inklui mós ho munisípiu Manufahi hanesan suku Tateker to’o Weberek Alas, aldeia Daor, Dalun no Tutuluro, suku Daisua to’o Gruto, suku Aitemua, Mindelo no Turiscai, suku Bernama to’o suku Liurai. Munisípiu Ainaro hanesan iha suku Raibere to’o Soru-kraik.

Notísia relevante: EDTL, E.P deside re-anunsia konkursu instala eletrisidade pakote 30

Nia dehan, tuir loloos prosesu instalasaun ba liña eletrisidade hahú iha tinan antes ne’e maibé tanba orsamentu xumba, halo prosesu sai paradu maibé daudaun prosesu konkursu la’o hela.

“Daudaun tékniku EDTL iha munisípiu halo ona identifikasaun ba suku sira hodi hahú faze konkursu. Suku  tolu  hanesan Tutuluro, Aitemua no Midelo daudaun iha faze asina kontratu ho kompañia hodi hahú implementa obra,” nia akresenta.

Aleinde ne’e, Autoridade Manufahi preokupa ho kondisaun estrada iha tempu udan.

“Ekipa Ministériu Obra Públika halo ona levantamentu ba suku sira ne’ebé nia estrada ho kondisaun a’at iha tempu udan no halo ona dezeñu detalladu ho Bill of Quantity (BoQ), tanba ne’e ha’u hanoin tempu badak sei hahú prosesu konkursu mós ba ida-ne’e,” nia akresenta.

Kona-ba bee-moos, tuir Autoridade munisipál ne’e, komunidade 75% iha rejiaun ne’e mak asesu ona.

Notísia relevante: 79% populasaun Manufahi asesu bee-moos ho sufisiente

“Suku lima iha postu Alas mak seidauk asesu ba bee-moos maibé suku tolu seluk kuaze asesu ona bee-moos. Hanesan mós Fatuberliu, iha suku balun hanesan suku Fahi-nehan mak seidauk asesu bee-moos, inklui postu Turiskai ne’ebé iha suku 11, iha suku haat maka seidauk asesu bee-moos,” nia akresenta.

Jornalista : Natalino Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here