Diretór Jerál MTK, Gaspar de Araújo. Imajen TATOLI/Francisco Sony

DILI, 01 outubru 2021 (TATOLI)—Kompañia internasionál na’in-20 hahú konkorre ona prosesu aprovizionamentu konkursu públiku internasionál, hodi sosa no instala ekipamentu kabu submarinu fibra ótika, hosi sidade Darwin no Port Hedland iha Commonwealth Austrália.

“Ita hala’o ona konkursu públiku ba projetu instalasaun kabu submarinu, ne’ebé kuaze kompañia internasionál na’in-20 maka konkorre ona prosesu aprovizionamentu ne’e,” Diretór Jerál Ministériu Transporte no Komunikasaun, Gaspar de Araújo, hateten, iha edifísiu Ministériu Finansa, Aitarak-laran, sesta ne’e.

Notísia relevante: Governu hahú diskute implementasaun projetu kabu submarinu fibra ótika

Governu esforsu halo projetu ne’e tuir planu bele finaliza iha maiu 2023, maibé depende kalendáriu tanba sei halo estudu no lori rejistu préviu ba Tribunál Konta ne’ebé sei han tempu.

Prezidente Komisaun interministeriál ba implementasun kabu submarine fibrika ótika, José Maria dos Reis, ho ekipa liña ministeriál responsável, nafatin halo esforsu halo buat hotu tuir planu no kalendáriu ne’ebé iha, nune’e tinan-rua ba oin bele iha ligasaun internet di’ak liu iha Timor-Leste.

“Ita hein ekipa tékniku halo avaliasaun dokumentu hosi empreza internasionál sira ne’e, ne’ebé tuir kalendáriu, bainhira buat hotu la’o loos, iha dezembru tinan ne’e, bele fó ona kontratu ba empreza vensedór sira,” nia akresenta.

Projetu fibra ótika sei lori Timor-Leste ba nível di’ak liu atu asesu ba informasaun no partisipasaun iha mundu globalizadu.

Governu prevee millaun $41,588 iha Fundu Infraestrutura hodi halo akizasaun ekipamentu informátiku kabu submarinu atubele ezekuta projetu iha tinan ne’e.

Polítika dada kabu submarinu hosi Darwin mai Timor-Leste nu’udar prioridade Governu ho kooperasaun Governu Canberra, ho objetivu atu elava kapasidade rede internet iha rai-laran, tanba VIII Governu Konstitusionál iha progama Governu eletróniku (E-Goverment), ne’ebé bainhira realiza presiza ligasaun liña internet ho kualidade.

Jornalista : Florêncio Miranda Ximenes

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here