Ekipa FC Maudoko. Imajen//FC Maudoko

DILI, 01 outubru 2021 (TATOLI) – Ekipa FC Maudoko la nakdoko hasoru dezafiu. FC Maudoko komprometidu atu hetan vitória no vitória ne’e sira mak sai na’in duni. Alias, vensedór terseira jornada LFT (Liga FetoTimor) iha époka ne’e.

Ekipa FC Maudoko susesu sai vensedór iha jornada terseiru jornada Liga Feto Timor hafoin trava nia adversáriu UNITAL FC ho rezultadu 5-0 iha jogu kontinuasaun LFT ne’ebé halao iha kampu FFTL, sesta lorokraik.

Iha minutu primeiru hahú, ekipa adversária rua lansa kedan kontra ho atake ba malu ho maka’as maibé FC Maudoko la nakdoko ho presaun tékniku, estratéjia no abilidade ekipa UNITAL FC nian. Maibé, Maudoko ho kapasidade individuál no ekipa nian domina kedan bola durante jogu la’o. Nune’e, iha minutu 10, Leonia Soares lansa kedan golu primeiru hodi hatuur rezultadu ba 1-0.

UNITAL FC labele halo buat ida tanba forsa Maudoko nian makas tebes iha kampu laran. Nune’e iha minutu 23, Leticia Claudia fura tan rede UNITAL hodi lori rezultadu ba 2-0. Esforsu boot ba UNITAL atu atinji tuir rezultadu ne’e.

“Rainha redonda” ka bola kabuar kuaze domina husi Maudoko FC. Nune’e ho serbisu no komunikasaun di’ak entre jogadór iha kampu laran, liu de’it minutu ida, iha minutu 24, Elvilia Amaral prodús tan golu hodi lori rezultadu provizóriu ba 3-0. Vantajen no oportunidade ba manan jogu husi FC Maudoko barak liután.

FC Maudoko halo jogu ofensivu. Ho jogu ne’e, fó duni vantajen ba sira-nia ekipa to’o atinje sira-nia objetivu. Maudoko la nakdoko. Enkuantu, UNITAL joga ho ofensivu maibé Maudoko sempre hamate sira-nia jogu nune’e difisil atu halo golu ruma. Guarda-rede FC Maudoko nian “la nakdoko” ho ameasa ruma, satán golu.

Oportunidade barak haliis ba FC Maudoko. Nune’e, esforsu oioin UNITAL FC halo nunka sobu serbisu hamutuk ekipa FC Maudoko hodi prodús netik golu ruma ba ekipa hodi muda rezultadu jogu.

Golu tolu ba FC Maudoko la to’o. Nune’e, kada segundu no minutu ne’ebé liu, FC Maudoko hatudu nafatin nia jogu bonitu kombina ho téknika no estratéjia oioin ne’ebé iha no mós komunikasaun efetiva entre jogadór sira. Nune’e, entre minutu 34 no 40, ekipa FC Maudoko prodús tan golu rua tutuir malu.

Iha minutu 34 no 40 ne’e, Carlota Tilman mak hatama golu rua. Ho golu rua ne’e, lori ekipa FC Maudoko nia rezultadu metin ba 5-0. FC Maudoko nia rezultadu metin no la nakdoko to’o jogu ramata. Tanba ne’e, rezultadu husi esforsu no serbisu hamutuk ekipa FC Maudoko nian lori sira iha direitu absoluta nu’udar vensedór ba terseira jornada LFT. Orgullu ba ekipa. Orgullu ba adeptu. UNITAL FC tenke hela ho zero (0) iha jogu ne’e ka lakon no hein fali oportunidade iha jornada tuirmai.

Jornalista: Hortencio Sanchez

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here