Formandu Sentru Dezenvolvimentu Komunitáriu (CDC, sigla portugés) Baucau, hala'o atividade kuda modo (hortikultura). Imajen/Doc. CDC Baucau.

DILI, 30 setembru 2021 (TATOLI)—Vise Diretór Sentru Dezenvolvimentu Komunitáriu (CDC, sigla portugés) Baucau, João do Carmo Pinto, informa tuir planu segunda (04/10) ne’e, CDC Baucau sei realiza formasaun movel ba benefisiáriu 160 iha munisípiu Baucau.

Nia hateten, formasaun movel ne’e sei hahú iha 04 to’o 21 fulan-outubru, ne’ebé sei hala’o iha iha suku haat mak Suku Samalari, Uailili, Gariuai, no Loilubo ho totál benefisiáriu hamutuk 160, kompostu hosi feto na’in57 no mane na’in103.

“Aminia formasaun movel ne’e segunda agora ami hahú ona. Objetivu realiza formasaun movel ne’e atu kapasita joventude dezempregu área rurál, liu-liu aminia juventude sira-ne’ebé mai tuir formasaun durante fulan neen nia laran. Agora sira fila ita liuhosi mobile training, ita fó apoiu materiál, ekipamentu no formasaun balun ba sira atu nune’e sira bele uza matéria hirak ne’e hodi uza ba kria kampu servisu ba sirania an,” João do Carmo Pinto hateten ba Agência Tatoli, via telefónika, kinta ne’e.

Iha formasaun movel ne’e, matéria ne’ebé fó-hanorin ba partisipante sira mak oinsá sira bele hatene konabá manajementu rai, viveiru, kompos (adubu), lideransa, post koileta, marketing no book keping.

Fundu ne’ebé Sekretária Estadu Formasaun Profisionál Empregu (SEFOPE) fó apoiu ba Sentru Dezenvolvimentu Komunitáriu (CDC, sigla portugés) Baucau, atu realiza formasaun movel ba área hortikultura ne’e hamutuk $28.050.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here