Diretór Jerál Protesaun Sivíl, Superientendente Asistente Polísia, Ismael da Costa Babo. Imajen/MI

DILI, 29 setembru 2021 (TATOLI)—Sekretária Estadu Protesaun Sivíl (SEPS), liu hosi Diresaun Prevensaun Konflitu Komunitária (DNPKK) ho UN-Women, realiza sorumutu ho liña ministériu no Organizasaun Naun Governamentál-sira, hodi deskuti estratejia estabelesimentu rede nasionál, to’o suku ba prevensaun konflitu komunitáriu.

Objetivu hosi sorumutu ne’e, atu kontribui partilla ideia hodi deskuti giaun ida hodi estabelese rede nasionál ne’ebé forte ba prevensaun konflitu komunitáriu.

Notísia relevante:SEPS ofisializa kooperasaun ho WFP

Rede nasionál ne’e atu kria kooperasaun entre liña ministéiru no sosiedade sivíl-sira hotu hodi promove nafatin pás liu hosi prevensaun konflitu komunitáriu, hanesan halo atividade sensibilizasaun, edukasaun sívika no mediasaun sensível jéneru ho inkluzivu atu envolve partisipasaun ema hotu inklui ema ho vunerável hanesan defisiénsia, idozu, feto ho labarik.

“SEPS agradese ba kooperasaun durante ne’e ho parseiru-sira hotu, ho estabelesimentu rede bele hasoru kooperasaun servisu, hodi promove pás no estabilidade, ” Diretór Jerál SEPS, Superitendente Polísia, Ismael da Costa Babo, hateten ba jornalista iha otél JL Villa, kuarta ne’e.

Progresu ne’ebé iha, durante ne’e maski akontese konflitu, maibé konflitu balun konsege halo prevensaun liu hosi mediasaun ne’ebé DNPKK ho parseiru halo parte, sira konsege simu-malu nahe-biti bo’ot hodi prevene konflitu.

Susesu seluk maka halo sensibilizasaun jéneru iha ministéiru ida-idak iha ne’ebé feto barak mak hola parte iha rekrutamentu promosaun iha funsaun.

Durante ne’e, DNPKK hala’o ona atividade mediasaun iha komunidade, formasaun liu hosi sensibilizasaun prevensaun konflitu antes akontese, edukasaun sívika ba iha nível komunidade hodi muda ema nia hanoin no atitude kontribui prevensaun konflitu.

Tuir dadus, hosi janeiru to’o agostu tinan ne’e, hosi territóriu DNPKK rejista kazu foun hamutuk 295, no kazu ne’ebé prosesu hela hosi 2020 mai 2021 iha 134 ho arkivu ka rezolve liu hosi prosesu mediasaun 196, ne’ebé ho autór no vítima iha mane 452 feto 132.

Tipu kazu hirak ne’e iha haat mak hanesan konflitu negósiu, interpesoál liga ba asaltu-malu entre joven, konflitu rai ho konflitu kestaun família.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here