Primeiru Ministru, Taur Matan Ruak, prezide reuniaun Konsellu Ministru, Iha Palásiu Governu, segunda (29/09). Imajen TATOLI/Francisco Sony

DILI, 29 setembru 2021 (TATOLI)–Governu liuhosi reuniaun Konsellu Ministru (KM) aprova projetu Dekretu Governu kona-ba medida ezekusaun deklarasaun Estadu Emerjénsia, ne’ebé efetua hosi Dekretu Prezidente Repúblika númeru 81/2021, loron 28 setembru, hodi hatán ba pandemia COVID-19.

EE ne’ebé renova ba da-XVIII, abranje territóriu nasionál tomak no sei vigora entre oras 00:00 loron 30 setembru 2021 to’o oras 23:59 loron 29 outubru.

Desizaun ne’e ezekutivu sira foti hafoin analiza aprezentasaun hosi Koordenadór Sala Situasaun Sentru Integradu Jestaun (CIGC, sigla portugés) kona-ba pontu situasaun epidemiolójika país.

“Kona-ba medida ezekusaun deklarasaun Estadu Emerjénsia, rejista alterasaun tolu”, Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kuarta ne’e.

Notísia relevante: PN autoriza Prezidente Repúblika dekreta estadu emerjénsia ba dala-XVIII

Alterasaun tolu maka hanesan,  sé maka kompleta ona vasinasaun no mai ka tranzita iha país sira ne’ebé iha variante delta SARS-COV-2, atu tama iha territóriu nasionál, tenke aprezenta rezultadu negativu teste ba COVID-19,  kumpre kuarentena loron-rua no hafoin  períodu ne’e, halo fali teste diagnóstiku COVID-19 ho prazu máximu oras 48 no hafoin to’o  iha país tenke halo teste foun diagnóstiku COVID-19.

Bainhira realiza eventu ruma iha kualkér parte país, obriga indivíduu sira hotu ne’ebé hela iha Timor-Leste atu realiza ezame médiku diagnóstiku COVID-19 ka aprezenta sertifikadu vasinasaun kompleta.

Nune’e mós, funsionáriu administrasaun públika hotu tenke simu vasina kontra COVID-19.

“Regra seluk mantein, liuliu obrigasaun ba indivíduu sira hotu ne’ebé hela iha Timor-Leste atu mantein distánsia pelumenus metru ida ho ema seluk ne’ebé maka la hela hamutuk,” Ministru akresenta.

Kontinua iha obrigasaun mós atu utiliza máskara oin ne’ebé taka inus no ibun, bainhira hakarak tama ka hela iha fatin públiku ka privadu hirak ne’ebé ema hotu uza, no fase-liman bainhira tama ba estabelesimentu komersiál, industriál ka prestasaun servisu, ka ba edifísiu servisu administrasaun públika funsiona,” Portavóz Governu dehan.

Durante vijénsia EE ba perídu ne’e, lisensa, autorizasaun, vistu no autorizasaun rezidénsia inklui aktu administrativu sira seluk sei válidu nafatin, la depende ba ninia prazu validade.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here