Prezidente Konsellu Ezekutivu INCT, José Cornélio Guterres. Imajen TATOLI/Francisco Sony

DILI, 29 setembru 2021 (TATOLI)—Prezidente Konsellu Ezekutivu Institutu Nasionál Siénsia Teknolojia (INCT), José Cornelio Guterres, husu ona péritu internasionál prepara rejime legál atubele aproxima nasaun Fransa hodi rejista International Standard Book Number (ISBN) asegura obra akadémiku hosi plajiárizmu ba ema nia obra no fasil públika peskiza sira.

“INCT halo ona aproximasaun ho autoridade nasaun Fransa, nune’e husu ona rejime legál ka dekretu-lei atu sai hanesan baze fundamentál atubele hetan autorizasaun rejista  no sai na’in ba ISBN iha Timor-Leste,” Prezidente INCT hateten ba Agência TATOLI, iha knaar fatin, kuarta ne’e.

Timor-Leste seidauk hetan autoridade atu fó lisensa ba universidade ka grupu peskiza ruma atu públika rezultadu peskiza sientífika iha livru ka jornál internasionál sira.

Tanba ne’e, universidade ka grupu peskiza sira iha Timor-Leste bainhira atu públika obra ruma, presiza husu lisensa ba Fransa, Portugal, Indonézia no Brazíl.

ISBN ne’e atu asegura rezultadu obra akadémiku ne’ebé peskizadór sira hakerek ona livru no kuandu publika ona ema seluk labele plajiu no bainhira akontese aktu ne’e, mak sei iha sansaun hanesan blacklist ba peskizadór hosi ninia peskiza akadémika.

“Kuandu esforsu hirak ne’e konsege hetan lisensa hosi nasaun Fransa, maka Instituisaun Ensinu Superiór no grupu peskiza sira la presiza aplika ba nasaun seluk, bainhira atu publika rezultadu peskiza ruma, tanba INCT bele fó ona lisensa ba sira,” nia afirma.

INCT ho péritu legál internasionál hahú elabora rejime legál atu submete ba Ministériu Ensinu Superiór Siénsia no Kultura (MESSK) hodi aprezenta iha Konsellu Ministru (KM) atu halo apresiasaun no aprovasaun.

“Iha fulan outubru jurizta sira finaliza ona elaborasaun rejime legál hodi entrega ba MESSK hodi aprezenta ba KM hodi hetan aprovasaun atubele fó konfiansa autoridade Fransa hodi fó autorizasaun,” nia hatutan.

INCT mós sei sosa software atu ajuda hodi deteta pesoál ruma halo plajiárizmu, maibé dalan dahuluk maka sei orienta peskizadór sira atu hakerek obra sira ho lian inglés no portugés tanba lian tetum programa ne’e sei la deteta.

Jornalista : Tomé Amado

Editora     :  Julia Chatarina

HAKEREK NO HATÁN

Please enter your comment!
Please enter your name here