Membru Polisia Nasional Timor Leste ida submete hela ba swab teste iha Sentru Integradu Jestaun Krize (SIJK), kuarta (29/09/21). Imajen Tatoli/António Gonçalves.

DILI, 29 setembru 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 10,  rekoperadu 69 no kazu ativu 778.

Totál óbitu ne’ebé relata ohin, feto ida ho idade 23, hela iha Baucau, seidauk vasina, iha 21 Setembru 2021, diagnóstikada Covid-19 iha Baucau.

Notisia relevante:COVID-19, mate ida no rekoperadu 128

Iha loron ne’e kedan hala’o izolamentu iha Baucau. Matebian iha mós problema cardiopatia congenital.

“Horiseik tuku 13:10, matebian i’is-kotu, iha Baucau. Familia kolabora ho ekipa saúde, hodi hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, kuarta ne’e.

Kazu foun ohin 10, mai hosi Dili na’in-hitu, no munisípiu seluk hamutuk na’in-tolu kompostu hosi mane rua no feto ualu.

Hosi totál kazu detetadu foun ohin, ho idade 20 na’in-tolu (17,0%) entre tinan 12-59 na’in-neen (60%), idade 60 na’in-ida, lima kazu ka 50% sintomatiku.

Kumulativu kazu konfirmadu sura hosi 21 marsu 2020 to’o  29 setembru 2021 hamutuk 19.455. Hosi horisehik mai ohin, teste ne’ebé Laboratóriu Nasionál Saúde halo hamutuk 228 PCR, ho detallu hanesan tuir-mai, Vijilánsia sentinela na’in-sanulu, rastreiu ba kontaktu ka Contact tracing rua,  Rastreiu Aleatóriu  ka Random Screening nain 14, viájen sai-hosi serka sanitária hosi Dili 62,  Viájen internasionál  34, Follow up iha kuarentena na’in 106.

Totál testes PCR ne’ebé halo horisehik 28 setembru iha munisípiu-sira seluk, RAEOA no HNGV hamutuk 227 ho detalla hanesan tuir-mai, Maubisse neen, Maliana ualu, Viqueque hitu, Suai 28, Baucau 25, Ermera tolu, RAEOA tolu, HNGV 80 no Lospalos 67.

Totál doze vasina ne’ebé fó ona ba populasaun elijível tinan 18 ba leten, to’o ohin dader tuku 10:00,  loron 29 setembru tuir sistema informasaun Saúde iha Ministériu Saúde ho totál  kumulativu 1ª doze iha Dili (78,2%) no  totál kumulativu 2ª doze  iha Dili (67,5%).

Ema ne’ebé simu ona vasina doze dahuluk iha Timor-Leste (58,7%) no simu ona doze daruak  (36,1%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 2,7/100 mil abitante, enkuantu ba de’it munisípiu Dili 5,0/100 mil abitante. Ohin, Baucau iha insidénsia 6,1/100 mil abitante. RAEOA iha insidénsia 4,2/100 mil.

Dadus iha leten hatudu katak, insidénsia munisípiu Dili, munisípiu Baucau no RAEOA tuir-tuir malu as-liu, iha Timor-Leste laran tomak, hatudu risku as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 29 setembru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 43,  ho detalle hanesan tuir mai grave hamutuk na’in-rua, na’in-rua uza ventiladór, moderadu hamutuk ema na’in 30. Kaman ema na’in 11.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here