Bainhira atu halo viajen ba munisípiu tenke lori no hatudu kartaun vasina (kinur) ba pesoál saúde no seguransa sira ne’ebé halo vijilánsia iha pontu entrada sira. vasinasaun. Imajen TATOLI/Egas Cristóvão.

OÉ-CUSSE, 27 setembru 2021 (TATOLI)—Atu prevene COVID-19, utoridade RAEOA liuhosi Dirasaun Servisu Administrasaun Estatál (MAE) RAEOA orienta jestór sub-rejiaun no autoridade lokál sira atu atende komunidade iha sede suku tenke aplika regulamentu hatudu kartaun vasina. 

“Persentajén COVID-19 iha Oé-Cusse sei menus, entaun Sekretáriu Administrasaun Estatál orienta jestór, xefe suku sira ho estrutura tomak iha kada suku tenke hasai regulamentu. Katak, bainhira sidadaun ruma trata deklarasaun suku, halo pagamentu bolsa da mãe, ba idozu invalidéz tenke hatudu kartaun vasina, ne’e obrigatóriu,” Sekretáriu Rejionál Asuntu Administrasaun, Martinho Abani Elu, informa ba Agênsia Tatoli iha Numbei, Oé-Cusse, segunda ne’e,

Regulamentu ne’e autoridade liuhosi Sekretáriu Administrasaun halo ona enkontru evaluasaun ho autoridade lokál sira iha semana kotuk, kada suku ida-idak atu halo jestaun iha suku, tanba autoridade RAEOA hakarak nia populasaun sira tenke simu hotu vasina, nune’e iha tempu badak RAEOA bele deklara livre hosi COVID-19.

Daudaun ne’e autoridade esforsu maka’as husu ajuda iha Governu sentrál atu apoiu ai-moruk ba populasaun, tanba Oé-Cusse jeografikamente baliza ho NTT entaun autoridade tenke enkoraja sidadaun hotu atu hakbesik-an ba iha fasilidade saúde hodi simu vasina, nune’e molok tama ba tinan 2022, Oé-Cusse bele livre hosi COVID-19.

“Bainhira persentajén vasina seidauk atinje 90% entaun Oé-Cusse sei kontinua aplika lockdown beibeik no kumpri kuarentena obrigatóriu durante loron 14, tanba moras COVID-19 laiha ema ida atu faan iha fatin ne’ebé deit,” nia dehan

Xefe suku Taiboko, Joaquin Tafin, hatete autoridade sira iha suku Taiboko, hahú ona sensibiliza ba komunidade. Molok realiza regulementu ne’e, presiza komunidade koñese uluk, nune’e bele kumpre atu lebele hamosu konfuzaun ba komunidade sira.

“Ami nia kalendáriu pagamentu ba bolsa da mãè sei hala’o iha outubru. Entaun aproveita oportunidade ne’e, ha’u informa ona ba xefe aldeia no xefe bairrru atu hahú sensibiliza ba komunidade, molok aplika regra ne’e iha suku. Maibé, klaru programa Governu, husu sidadaun hotu tenke simu vasina,” nia dehan

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here