Diretór Relasaun externa komunikasaun no advokasia CNC, Gaudêncio de Sousa. Imajen Tatoli/ Sérgio da Cruz.

BOBONARO, 28 setembru 2021 (TATOLI)—Centro Nacional Chega (CNC), sei realiza atividade tolu, hodi komemora loron istóriku trajedia Balibo five ba dala 46, iha loron 16 outubru.

“Atividade tolu ne’e mak hanesan, Chega Tour, mini audiénsia públiku no live Talk Show,” Diretór Relasaun externa komunikasaun no advokasia CNC, Gaudêncio de Sousa, hateten ba jornalista-sira, iha Komandu PNTL munisípiu Bobonaro, tersa ne’e.

Notísia relevante:CNC-Asosiasaun Vítima apoia “Uma Memória Esperansa” 11 ba sobrevivente sira

Atividade Chega Tour  sei hahú iha 13 outubru, sei tula estudante no jornalista-sira, vizita sítiu istóriku sira, iha Balibo no Monumentu Masakre Setembru Negro Polres Maliana, hanesan programa transmisaun memoria interjerasionál, atu jornalista no estudante-sira bele rona direta istória hosi vítima no sasin moris sira, kona-ba akontesimentu sira iha fronteira.

Audiénsia públika sei foku liu ba iha violasaun direitu umanu ne’ebé mak akontese hahú hosi 1975 to’o 1999, maibé foku de’it ba akontesimentu no masakre iha fronteira.

“Ita sei bolu testamuña ka vitima sira ne’ebé haree hetan akontesimentu sira ne’e, atu ko’alia-sai ba públiku, inklui CNC sei halo gravasaun no ida-ne’e sai hanesan arquivu ida, ba objetivu edukasaun, peskiza ba istória TL,” nia esplika.

Kona-bá atividade datoluk maka sei bolu vitima no sasin moris-sira mai konta istória iha programa Live Tolk Show direita iha Balibo, ne’ebe sei foku mós kona-bá violasaun direitu umanu no sei halo mós lansamentu ezebisaun ida kona-bá kontekstu direitu umanu en jerál, espesifikamente akontesimentu violasaun direitu umanu iha munisípiu Bobonaro.

“Ami identifika ona kada postu sei repezenta ema na’in-ida, ne’e sei haree tuir ninia sekuénsia no eventu ne’ebé mak akontese, karik hahú ho funu Maun-alin, UDT oho FRETILIN no FRETILIN oho UDT, levantamentu armada kontra levantamentu armada ou Golpe kontra Golpe,” nia haktuir.

Atu kompleta programa hirak ne’e, CNC mós halo ona konsultasaun ho entidade tomak lider komunitária, komunidade iha postu administrativu neen hosi Munisípiu Bobonaro, atu delega vítima no sasin moris sira, hodi deklara ba públiku kazu violasaun direitu umanu ne’ebé akontese iha área Fronteira Bobonaro.

Iha fatin hanesan Komandante Polísia Nasionál Timor-Leste (PNTL), Munisípiu Bobonaro, Superintendente, Antoninho Mauluta, hateten polisia sei garante situasaun hakmatek durante komemorasaun trajedia Balibo five ba dala 46, ne’ebé sei realiza hahú hosi 12 to’o 16 outubru 2021.

Iha sekuénsia programa ne’e sei  involve ema barak, nune’e Komandu PNTL Bobonaro sei koordena mós ho Unidadade Espesiál Polisia, COE, BOP no UPF atu tau forsa hamutuk, hodi  halo vizilánsia másima, nune’e bele garante komemorasaun loron importante ne’e la’o ho susesu.

Loron 16 fulan outubru 1975 sai hanesan loron trajedia ne’ebé koñesidu ho naran Balibo five, tanba militár Indonézia oho jornalista Autralianu no Neozelandeze na’in-lima, bainhira hala’o kna’ar jornalizmu iha fatin ne’e.

Jornalista na’in lima ne’e mak hanesan, Greg Sahcelton (Reporter), Tony Stewart (Gravador lian), Gary Chunningham (Operador Camara) hosi Mídia HSV-7 (Seven Network) Melbroune, Brian Peters (Operador Camara) no Melcolm Rinnie (Reporter) hosi Mídia TCN-9 (Nine Network) Sydney.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here