BAUCAU, 27 setembru 2021 (TATOLI)—Xefe suku Fatulia, postu administrativu Venilale, munisípiu Baucau, Angelino Moisés Pereira, hateten, ekipa finaliza ona prosesu rekollimentu dadus uma-lisan no totál vítima ne’ebé mate hosi suku ne’e durante funu nia laran.
Atividade ne’e bazeia ba orientasaun hosi Sekretaria Estadu Kombatente no Libertasaun Nasionál (SEKLN).
“Ami hamutuk ho ekipa rekollimentu dadus konsege finaliza ona hosi aldeia haat iha suku Fatulia, maibé to’o oras-ne’e daudaun dadus hirak ne’e sei iha sede suku tanba ekipa hosi nasionál seidauk resposta atu mai foti dadus,” Líder Komunitáriu ne’e informa iha Sentru Konvensaun Baucau (CCB, sigla portugés) segunda ne’e.
Nune’e bazeia ba dadus ne’ebé iha, suku Fatulia ho totál uma-lisan hamutuk 52 no totál ema ne’ebé lakon vida durante funu hahú hosi tinan 1975 to’o 1999 hamutuk na’in 302.
Iha fatin hanesan, Administradór postu Venilale, Miguel Mendes Manso Guterres, hateten, nia parte hamutuk ho Xefe suku na’in-ualu hala’o sorumutuk no orienta ekipa atu aselera prosesu rekollimentu dadus uma-lisan iha postu Venilale.
Miguel rasik dadaun ne’e seidauk hatene totál dadus loloos uma-lisan no vítima mortál iha postu Venilale, tanba iha suku balun sei iha faze rekollimentu dadus.
Antes ne’e, SEKLN lansa programa rekollimentu dadus uma-lisan, ho objetivu atu rejista nu’udar patrimóniu kulturál Timor-Leste ne’ebé Governu sei utiliza atu halo planu dezenvolvementu nasionál.
Suku Fatulia kompostu hosi aldeia haat hanesan Bahadato, Osso-aaque, Uai-to-bono no Uaitulia-anan, ho totál populasaun hamutuk na’in-2.721 hosi uma-kain 688.
Jornalista : Natalino Belo
Editora : Julia Chatarina
