Xefe Investigasaun VPU Covalima, Primeiru Sarjentu Polisia, Amelia de Jesus Amaral. Imajen/Eugénio Pereira

COVALIMA, 27 Setembru 2021 (TATOLI)-Husi janeiru to’o setembru, Komandu Polísia Munisípiu Covalima liuhosi  Unidade ema  Vulnerável (PNTL-VPU) rejista kazu hamutuk 38.

“Ami regista kazu hahú iha janeiru to’o setembru  tinan ne’e,  kazu hosi postu ne’ebé pertense ba Covalima hamutuk 38,” Xefe Investigasaun VPU, Amélia de Jesus Amaral ba Agência Tatoli, iha nia kna’ar-fatin, segunda ne’e.

Kazu sira ne’e, tuir Xefe Investigasaun VPU Covalima, Primeiru Sarjentu Amelia de Jesus Amaral katak ho tipu hanesan Violénsia  doméstika fízika, abuzu seksuál, violasaun seksuál, konflitu ida no abuzu seksuál mane ho mane ne’e ida.

Autór sira ne’ebé komete iha kazu hirak ne’e, VPU halo tiha investigasaun no rekomenda ba Ministériu Públiku hodi prosesa kazu sira ne’e ba Tribunál Distritál Suai hodi halo julgamentu no kazu abuzu seksuál ida aplika prizaun preventiva.

Maske iha ona lei kontra violénsia doméstika, maibé tuir autoridade másima investigasaun VPU, Amélia de Jesus katak kazu violénsia doméstika kontinua aas. “Ita hakarak redus kazu, hasa’e komunidade nia konsiénsia rasik liuhosi parseiru hodi halo esplikasaun kona-ba idaidak nia papél,”  Xefe investigasaun ne’e dehan.

Daudaun ne’e VPU Covalima iha rekursu na’in-11 ne’ebé hala’o servisu iha PNTL Covalima kobre too postu administrativu no suku.

Postu administrativu sira iha munisípiu Covalima mak Fatululik, Fatumean, Fohorem, Mape-Zumalai, Maucatar, Suai no Tilomar.

Dezafiu servisu ne’ebé VPU Covalima enfrenta maka menus transporte no fasilidade servisu hanesan komputadór no materiál servisu seluktan.

Notísia relevante:ALFeLa fó asisténsia legál ba kazu violénsia doméstika iha Covalima

Jornalista:Celestina Teles

Editór : Rafy Belo

HAKEREK NO HATÁN

Please enter your comment!
Please enter your name here