Xefe Departamentu Komunikasaun Sosiál UNTL, Marcelino Ximenes Magno. Imajen TATOLI/Egas Cristóvão

DILI, 27 setembru 2021 (TATOLI)–Ajénsia  Nasionál Avaliasaun no Akreditasaun Akadémiku (ANAAA) re-avalia kursu komunikasaun sosiál iha Universidade Nasionál Timor-Lorosa’e (UNTL) atu haree progresu hosi kursu ne’e rasik molok hakat ba akreditasaun.

Xefe Departementu Komunikasaun Sosiál UNTL, Marcelino Ximenes Magno, informa, inisiativa ne’e atu hatene progresu saida maka departementu ne’e prodúz durante tinan-rua nia-laran.

“Molok sira atu halo re-avaliasaun ba kursu sira ne’e, husu ami tenki prepara dokumentu hotu kona-ba relatóriu dosente no estudante nian, kualidade hanorin, kuríkulu, servisu komunitáriu, inklui matéria ensinu,” Xefe Departementu hateten iha resintu UNTL, segunda ne’e.

Relatóriu sira ne’ebé aprezenta maka ANAAA utiliza nu’udar matéria hodi halo re-avaliasaun ba kursu komunikasaun sosiál ninia ezisténsia.

Nune’e, Ajénsia iha tempu fulan-ida atu estuda relatóriu sira no ohin deside hodi halo re-avaliasaun bazeia ba dokumentu ne’ebé departementu iha universidade nasionál ne’e aprezenta.

Tuir Xefe Departementu, re-avaliasaun ne’e nu’uar prosesu ikus hodi termina kursu neen ne’ebé ezisti iha UNTL, ne’ebé ninia rezultadu sei anunsia iha tempu tuir mai.

Enkuantu, Diretór Ezekutivu ANAAA, Edmundo Viegas, hateten, ekipa avaliadór kompostu hosi nasionál no internasionál sira, maibé daudaun seidauk bele transmite informasaun espesífiku relasiona ho rezultadu re-avaliasaun tanba seidauk iha rezultadu.

“Ita seidauk bele anunsia rezultadu ruma hosi re-avaliasaun ne’e tanba ita sei hein rezultadu hosi ekipa avaliadór sira no kuandu sira fó ona rezultadu maka ita bele publika,” nia hatutan.

Jornalista : Tomé Amado

Editora      : Julia Chatarina

HAKEREK NO HATÁN

Please enter your comment!
Please enter your name here