Ilustrasaun COVID-19. Imajen/Espesiál

DILI, 26 setembru 2021 (TATOLI)—Sala Situasaun, Sentru Integradu Jestaun Krize (CIGC, sigla portugés) rejita kazu pozitivu COVID-19 ba ohin loron hamutuk 32, rekuperadu 83 no kazu ativu 994.

Hosi númeru pozitivu foun ohin, hosi Dili na’in-27 no munisípiu seluk na’in-lima, ne’ebé iha kazu 12 (37,5%) maka aprezenta sintomátiku ka hatudu sintoma, enkuantu seluk ho kondisaun asintomátiku ka laiha sintoma.

“Kazu detetadu foun ohin, lima (16%) simu ona vasina kompletu, 13 (41%) simu ona vasina doze dahuluk. Totál kumulativu kazu konfirmadu 19.382 no totál óbitu 113,” Koordenadór Forsa Tarefa ba Prevensaun no Mitigasaun Surtu COVID-19, Rui Maria de Araújo, hateten, liuhosi nota komunikadu ne’ebé Agência TATOLI asesu, domingu ne’e.

Notísia relevante: COVID-19, óbitu rua no rekuperadu 103

Enkuantu, númeru kazu foun redúz tan, kompara ho horiseik no kazu rekuperadu nafatin barak liu kazu detetadu foun.

Aleinde ne’e, númeru óbitu laiha, maibé 92,9% ne’ebé reprezenta 105/113 hosi ema ne’ebé mate ho/tan ba COVID-19 seidauk vasina kompletu.

Nota informativa mos refere katak númeru ema ne’ebé hala’o tratamentu ospitalizadu aumenta oituan kompara ho horiseik.

Hosi horiseik mai ohin, teste ne’ebé Laboratóriu Nasionál Saúde halo hamutuk 102 PCR, kompostu hosi vijilánsia sentinela rua, Contact tracing 19, Random Screening 12, Viajen sai hosi serka sanitária hosi Dili 41, viajen internasionál sia, no follow up iha kuarentena 19.

Teste PCR ne’ebé halo horiseik iha munisípiu sira seluk, Rejiaun Administrativa Espesiál Oé-cusse Ambeno (RAEOA) no Hospital Nasional Guido Valadares (HNGV) hamutuk 252, kompostu hosiBaucau 51, Ermera  lima, Maliana 25, Maubisse lima, RAEOA  24, Suai 32, Viqueque 25, Lospalos 75 no HNGV 79.

Izolamentu halo tratamentu kazu detetadu pozitivu ohin hamutuk 53

Izolamentu Vera Cruz, Lahane, HNGV no fatin seluk iha territóriu laran tomak, halo tratamentu ospitalizadu ba kazu detetadu pozitivu ba ohin loron nia hamutuk 53, kompostu hosi grave hitu, moderadu 33 no leve 13.

“Husu ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individuál, ne’ebé Governu hatuur ona, atu prevene moras COVID-19 da’et ba mai,” Koordenadór CIGC apela.

Regra hirak ne’e mak hanesan uza máskara, fase liman beibeik ho sabaun ka dezinfetante ruma , evita kose liman ba matan, inus ho ibun, bainhira kumprimenta malu la presiza ka’er liman, bensa-liman, rei-malu ka haku’ak malu evita halibur malu barak  hamriik ka tur do’ok hosi ema seluk mínimu metru ida ho balun.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here