SEKOMS Mericio Juvinal dos Reis 'Akara' hala’o enkontru ho autoridade Postu no lideransa komunitária Iliomar, Munisípiu Lautem hodi diskute instala rádiu komunidade, sábadu (25/09). Imajen TATOLI/Natalino Belo

LAUTEM, 25 setembru 2021 (TATOLI) – Sekretáriu Estadu Komunikasaun Sosiál (SAKOMS), Mericio Juvinal dos Reis ‘Akara’ hala’o enkontru ho autoridade sira Postu Administrativu Iliomar, Munisípiu Lautem, hodi diskute instalasaun rádiu komunidade iha tinan oin.

“Desizaun klaru ona katak harii rádiu komunidade iha Iliomar, ha’u simu proposta hosi autoridade suku, veteranu inklui administradór postu ne’ebé asinadu mós hosi Asministradór Munisípiu nune’e agora parte tékniku mak sei prepara no planu tinan oin tenke estabelese ona,” Mericio Akara hateten iha edifísiu postu Iliomar, sábadu ne’e.

Akara akresenta, importante mak iha faze preparasaun presidia koordenasaun entre entidade hotu iha postu Iliomar ho didi’ak, atu nune’e, labele mosu dezentendimentu liuliu parte uma atu sai edifísiu, estrutura konsellu, jestór no rekursu umanu.

Objetivu hosi harii rádiu refere, tanba durante ne’e mídia konsentra hotu iha Dili nune’e presiza desentraliza komunikasaun iha munisípiu liuhosi harii rádiu komunidade atu nune’e divulga informasaun iha munisípiu too aldeia hotu.

Iha fatin hanesan Administradór Postu Iliomar, Jacob dos Reis, hateten prontu apoia planu instalasaun rádiu komunidade iha Iliomar.

Proposta hosi povu liuhosi autoridade suku depois administradór vistu no Administradór Munisípiu aprova hodi hato’o ba gabinete SEKOMS.

Daudaun ne’e, ekipa tékniku hosi SEKOMS hahú koordena ho autoridade suku hodi prepara kondisaun antes instala rádiu komunidade iha Iliomar ne’ebé sei operasionalizadu iha tinan 2022.

Total orsamentu ne’ebé utiliza pur-volta  $23,000 despeza ba ekipamentu la inklui tore no infraestrutura.

Jornalista     : Natalino Belo

Editor         : Francisco Simões

HAKEREK NO HATÁN

Please enter your comment!
Please enter your name here