COVALIMA, 24 setembru 2021 (TATOLI)- Rejistu Sivíl no Notariadu (RSN) Covalima seidauk bele transporta blanku sertidaun RDTL orijinál hosi Dili ba Covalima tanba laiha transporte.
“Ami laiha transporte atu transporta blanku sertidaun RDTL orijinál hosi Dili mai iha Covalima no ami mós komunika ho nasionál no ami sei haree tempu hodi foti blanku orijinál iha nasionál,” Diretór Munisipál Konservatóriu Rejistu Sivíl no Notariadu, António Sarmento, ba Agência Tatoli iha nia kna’ar fatin, sesta ne’e.
Nia hateten, iha nasionál mós transporte limitadu, nune’e RSN mós sei buka solusaun hodi halo komunikasaun ho instituisaun seluk ne’ebé hosi Dili atu mai Covalima bele haruka mai iha Covalima.
Durante ne’e, RSN iha transporte ida maibé agora avaria no ekipa hosi nasionál lori ona ba Dili atu halo manutensaun.
Dadus hosi Rejistu Sivíl no Notariadu fulan agostu ne’e sidadaun trata sertidaun RDTL hamutuk 333.
Jornalista : Celestina Teles
Editór : Francisco Simões
