Kondisaun Sentru Izolamentu Ospitál Lahane, tersa (02/03). Imajen Tatoli/António Gonçalves.

DILI, 24 setembru 2021 (TATOLI)—Bacelar Martins Correia hosi munisípiu Ermera fó sasin katak, nia konsege rekopera hosi COVID-19, hafoin kumpre tratamentu intensivu iha sala izolamentu Lahane durante semana ida, maski antes ne’e sofre iis-boot.

Bacelar Martins Correia detetadu pozitivu COVID-19 iha 15 agostu no baixa iha Sentru Saúde Gleno, ikus-mai transfere ba sentru izolmentu Lahane iha 22 agostu.

Notísia relevante:COVID-19, mate ida no rekoperadu 148

Durante iha izolamentu Lahane, hetan tratamentu di’ak tebes hosi médiku-sira no konsege iha mudansa boot hodi transfere fila fali ba iha Ospitál Nasionál Guido Valadares (HNGV) iha 29 agostu, no oras-ne’e kompleta tan ona semana rua.

“Antes ne’e ha’u grave, maibé agora ha’u iha ona mudansa lubuk ida tanba ha’u mós vasina kompletu  ona,” nia hateten ba jornalista iha HNGV, sesta ne’e.

Nia husu ba ema hotu ne’ebé seidauk vasina, bele hakat ba sentru vasinasaun ne’ebé besik atu simu vasina, tanba moras ne’e perigu duni.

Pasiente ne’ebé sei alta iha tempu badak hosi HNGV ne’e fó-sasin mós katak, antes ne’e nia sofre duni moras tensaun no nia sente perigu liu bainhira sofre COVID-19, tanba dada-iis susar, sorte di’ak durante iha izolamentu Lahane médiku-sira fó atendimentu di’ak tebes.

Iha fatin hanesan, médiku internista HNGV, Hélio Guterres, hateten pasiente ne’e tama iha izolamentu Lahane ho síntoma COVID-19  hanesan iss-boot no tenke uza oksijéniu.

“Tuir planu, pasiente ne’e sei alta iha tempu badak nia laran. Ami halo nafatin observasaun no agora  buat hotu di’ak,” Hélio Guterres, subliña.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here