Sekretáriu Jerál Federasaun Futeból Timor-Leste (FFTL), Nelio Isaac Sarmento. Imajen Tatoli/António Gonçalves

DILI, 22 setembru 2021 (TATOLI) – Sekretáriu Jerál Federasaun Futeból Timor Leste (FFTL), Nelio Isaac Sarmento, agradese ba eis Prezidente FFTL, Francisco Kalbuadi Lay, ne’ebé ho esforsu tomak hamutuk ho nia amigo sira iha estrutura AFF bele realiza jogu AFF maski   enfrenta hela pandemia global COVAD-19.

“FFTL agradese no orgullu ba ita-nia eis Prezidente FFTL nu’udar Timor-oan nia bele jere Suzuki ne’e hala’o iha tinan ida ne’e iha situasaun pandemia COVID-19 nia laran, FFTL agradese tebes ba nia esforsu tomak to’o susesu,” Nelio Isaac Sarmento hateten ba Agência Tatoli iha FFTL, kuarta ne’e.

Francisco Kalbuadi  Lay nia pozisaun iha estrutura AFF hanesan Vise-Prezidente no okupa mós pozisaun hanesan Prezidente kompetisaun ba Asian nian.

“Hanesan Timoroan orgullu ba kontribuisaun Francisco Kalbuadi Lay nia kontribuisaun ba futeból iha Asian nian maka’as tebes,” Nelio Isaac Sarmento hateten.

TL Vs Brunei Darussalam

Bazeia ba sorteiu ne’ebé hala’o horiseik via online ba jogu Suzuki Cup 2020 ekipa selesaun nasionál Timor-Leste obrigadu tenke kontra ekipa hosi Brunei Darussalam iha jogu play of hafoin hakat ba faze grupu.

Nelio Isaac Sarmento hateten, jogu Suzuki Cup ne’ebé organiza hosi Asian Football Federation (AFF) sei hala’o iha dezembru mai ne’e.

“Husi sorteiu ne’ebé horiseik ita halo rezultadu hatudu katak, ita sei joga uluk lai play of  bainhira manan Brunei mak hakat ba faze grupu iha Grupu A, se lakon mak sei la tama no fila hikas mai Timor-Leste,”  Nelio Isaac hateten.

Oráriu ba jogu play of entre Timor – Leste ho Brunei sei hala’o iha loron 01 dezembru mai ne’e no iha nasaun ne’ebé AFF seidauk deside.

“Ita nia ekipa kompara ho tinan sira liubá agora ita di’ak liu tanba preparasaun ho tempu kleur, nune’e antes ita ba partisipa Suzuki, ita sei ba partisipa uluk play of ba AFC Cup iha Singapura ne’ebé ita haree bainhira iha jogu hala’o iha Singapura ne’e di’ak, entaun iha Suzuki ne’e mós di’ak,” nia dehan.

Nasaun ne’ebé sei partisipa iha jogu ne’e hamutuk 11. Husi númeru ne’e nasaun sia (9) automatikamente tama ona iha grupu no na’in rua (2) mak tuir play of hodi avansa ba grupu se lakon automatikamente retira.

Tuir sorteiu ne’ebé dada ona fahe ba grupu rua (2) A no B, husi grupu A kompostu husi nasaun lima mak hanesan, Tailándia, Filipina, Myanmar, Singapura no ida mak Timor – Leste ka Brunei tanba sei joga play of mak hakat ba grupu refere. Enkuantu Grupu B mak hanesan, Indonézia, Malázia, Vietname, Cambodia no Laos. Selesaun Timor – Leste sei reprezenta husi jogadór senior no jogadór balun hosi U-23 nian.

Jornalista       : Hortencio Sanchez

Editór            : Francisco Simões

HAKEREK NO HATÁN

Please enter your comment!
Please enter your name here