Tanente Jenerál Lere Anan Timur. Imajen TATOLI/Egas Cristovão.

DILI, 22 setembru 2021 (TATOLI)—Xefe Estadu Maiór Jenerál FALINTIL-Forsa Defeza Timor Leste (F-FDTL), Tenente Jenerál Lere Anan Timur, hateten rekrutamentu F-FDTL nian ba turnu daruak tinan 2022 ne’e depende ba orsamentu.

“Depende mós Governu tanba buat hotu Governu mak deside. Ha’u hanoin katak ita-nia Governu deside mak taka sai tan vaga ba segundu turnu ba 2022 maibé ne’e depende ba orsamentu, tanba orsamentu laiha ita labele halo milagre,” Tenente Jenerál Lere Anan Timur ba jornalista sira hafoin hala’o enkontru semanál ho Prezidente Repúblika Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kuarta ne’e.

Iha enkontru ne’e, Tenente Jenerál Lere Anan Timur informa ba Prezidente Repúblika kona-ba rekrutamentu ba membru F-FDTL ne’ebé han tempu kle’ur, tanba de’it COVID-19 no difikuldade finanseira entaun foin mak atu inkorpora rekrutamentu foun ba militár iha 27 setembru 2021.

“Ohin no aban sei bolu preliminár hodi konfirma, sira mai hotu ka balun keta moras ka balun keta rezigna-aan. Buat sira-ne’e hotu atu avansa ho ninia rezerva sira-ne’e,” nia dehan.

Nia hateten, ho forsa armada foun ne’ebé mak 27 setembru inkorpora ona rekrutamentu foun ba militmilitár ne’e ema barak mak la satisfas ho rezultadu ne’e, maibé Tenente Jenerál husu ba joven sira ne’ebé idade 30 mai kraik prepara aan tanba forsa armada sei presiza tan ema 3.000 ka 4.000.

Entretantu, Tenente Jenerál Lere atu klarifika katak jerasaun rejime espesiál, jerasaun patriota sira klandestina ninia oan hanesan vaga fó fatin ba na’in-lima maibé agora na’in-rua de’it mak liu.

Doasaun hosi Repúblika Xina

Xefe Estadu Maiór Jenerál FALINTIL, Forsa Defeza Timor Leste (F-FDTL), Tenente Jenerál Lere Anan Timur informa ba Prezidente Repúblika kona-bá doasaun ne’ebé Repúblika Xina fó ba F-FDTL hanesan material funu nian, kilat, komunikasaun no viatura.

“Forsa armada agradese ba Repúblika Xina ne’ebé solidáriu nafatin Timor-Leste desde situasaun ne’ebé difisil no funu solidáriu nafatin Timor,” Tenente Jenerál Lere Anan Timur hateten.

Nia hatete, agora mós sira la haluha sira-nia responsabilidade nu’udar nasaun dezenvolvidu, boot no la haluha mós fó apoiu ba nasaun sira-ne’ebé envia dezevolvimentu ka nasaun ne’ebé foin harii nia Estadu.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here