VIQUEQUE, 22 setembru 2021 (TATOLI)—Minitériu Interiór (MI), liuhosi Gabinete Planeamentu Estratéjiku no Asesoria (GPEA), hala’o sosializasaun no sensibilizasaun kona-bá lei númeru 47/2020, fulan outubru no diploma ministeriál númeru 28/2021, 7 marsu ba funsionáriu-sira ne’ebé destakadu iha munisípiu Viqueque.
Objetivu hosi sensibilizasaun ne’e, atu fahe informasaun kona-bá lei ne’e nune’e funsionáriu-sira bele kompreende no banati tuir iha serbisu lorloron.
Notísia relevante:MS sosializa estratejia nasionál ai-han seguru ba liña ministeriál Viqueque
“Membru-sira tenke kompreende lei no diploma ministeriál atu bele serbisu tuir, tanba lei ne’e sai hanesan baze fundamentu ida iha serbisu lorloron,” Diretór GPEA, Francisco Soares, hateten ba jornalista iha salaun adiministrasaun munisipiu Viqueque, kuarta ne’e.
Iha serimónia abertura, administradór munisípiu Viqueque, Januariu Soares Bolly, konsidera lei no diploma ministeriál ne’e importante ba membru MI hodi iha koñesimentu atu hala’o funsaun ho di’ak.
Tanba ne’e nia husu nafatin ba funsionáriu sira atu kontinua apreende nafatin hodi kompriende didiak lei ne’e atu bele implementa ho diak iha serbisu fatin.
Sensibilizasaun durante loron ida ne’e, hetan partisipasaun hosi membru-sira mai hosi Departementu Protesaun Sivíl, Bombeiru, Seguransa ba Patrimóniu Estadu no Jestaun Risku Dezastre Natural.
Jornalista: Vitorino Lopes da Costa
Editór: Cipriano Colo
