COVALIMA, 21 Setembru 2021 (TATOLI)—Diretòr Servisu Rejistu Sívil no Notariadu (SRCN, sigla potugés) Covalima, António Sarmento, informa durante semana rua komputadór ne’ebé atu print-out Billete Identidade (BI) avaria, entaun Servisu Rejistu Sivil no Notariadu labele atende sidadaun sira-ne’ebé trata Billete Identidade (BI).
“Komputadór print-out BI ne’e avaria durante semana rua ona, entaun am labele atende sidadun sira atu halo BI. Problema ne’e, ami halo ona komunikasaun ho IT hosi nasionál no iha tempu badak sira atu mai rezolve,” António Sarmento informa ba Agência Tatoli, iha nia kna’ar fatin, tersa ne’e.
Maske komputadór avaria maibé ba sidadaun sira-ne’ebé trata BI ho urjente, Servisu Rejistu Sivil no Notariadu halo ona komunikasaun ba nasionál hodi fasilita sidadaun sira ne’e bele hasai BI iha nasionál.
Diretòr ne’e mós husu ba sidadaun sira-ne’ebé provizóriu print BI ho surat tahan baibain de’it ne’e, bainhira komputadór di’ak ona mak bele imprime fali BI orijinál.
Iha flan-agostu ne’e, tuir dadus hosi Servisu Rejistu Sivil no Notariadu Covalima, sidadaun sira-ne’ebé trata ka hasai Billete Identidade hamutuk 265.
Jornalista : Celestina Teles
Editór : Cancio Ximenes
