Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, segunda (20/09). Imajen TATOLI/Francisco Sony

DILI, 20 setembru 2021 (TATOLI)–Governu liuhosi reuniaun Konsellu Ministru (KM) extraordinária aprova Dekretu-Lei, ne’ebé aprezenta hosi Primeiru-Ministru, Taur Matan Ruak, hodi kria Ajénsia Nasionál ba Planeamentu, Monitorizasaun no Avaliasaun (ANAPMA).

Ministru Prezidénsia Konsellu Ministru, Fidelis Manuel Leite Magalhães, hateten, ho aprovasaun diploma ne’e, Unidade ba Planeamentu, Monitorizasaun no Avaliasaun (UPMA) halakon no substitui ba ANAPMA, hanesan servisu sentrál administrasaun direta Estadu ho autonomia administrativa no finanseira.

“Ajénsia ne’e, ninia misaun maka fó apoiu tékniku no administrativu ba Primeiru-Ministru no iha kompeténsia ba fortalesimentu institusionál Estadu inklui koordenasaun asaun membru Governu, liuliu atu konkretiza objetivu no meta sira ne’ebé prevee iha Programa Governu,” Ministru Fidelis relata hafoin reuniaun ezekutivu, iha Palásiu Governu, segunda ne’e.

Nune’e, ajénsia nasionál ne’e iha responsabilidade atu organiza, koordena no superviziona prosedimentu no prosesu administrativu sira ba planeamentu plurianuál, hosi médiu prazu no períodu tinan lima, inklui monitorizasaun no avaliasaun ba ninia implementasaun.

“Ajénsia ne’e dirije hosi Diretór Ezekutivu ida, ne’ebé ierarkiamente subordina ba Primeiru-Ministru no koadjuva hosi Diretór Adjuntu na’in-tolu, ne’ebé responsável ba área administrasaun no finansa, área planeamentu, inklui área monitorizasaun no avaliasaun,” Portavóz Governu  esplika.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here