Diretór STAE Munisípiu Covalima, Cláudio Cardoso. Imajen Tatoli/Celestina Teles

COVALIMA, 20 Setembru 2021 (TATOLI)—Sekretáriadu Tékniku Administrasaun Eleitoral (STAE) Covalima, fulan setembru ne’e rejista ona eleitór foun ho númeru provizóriu hamutuk na’in-265. 

Notísia Relevante: STAE Covalima rejista eleitór foun 730

“Ami rejista ona eleitór foun ne’e hahu iha loron 13 to’o 17 setembru, númeru provisóriu hamutuk na’in 265. Iha semana kotuk, STAE Covalima distribui ona   ekipamentu no funsionáriu sira dezloka ona ba postu administrativu ne’ebé pertense iha munisípiu Covalima,” Diretòr STAE Covalima, Claudio Cardoso, informa ba Agencia Tatoli, iha nia kna’ar fatin, segunda ne’e. 

Atendementu ba sidadaun ne’ebé kompleta ona idade 16 to’o 17 atu hasai kartaun eleitoral  iha postu administrativu hahú iha segunda to’o kinta-feira, tanba iha sesta-feira ekipa sira tenke halo sinkronizasaun dadus iha munisípal atu evita sidadaun sira-ne’ebé dupla resensiamentu.

Maibè, nia informa, durante ne’e STAE halo resensiamentu iha Covalima la deteta sidadaun ne’ebé dupla resensiamentu.

Hosi sidadaun ne’ebé kompleta ona idade 16 to’o 17 ne’ebé rejista eleitór foun na’in-265 ne’e, kompostu hosi feto 116 no mane 149, eleitor atualizadu na’in 156 kompostu hosi mane 112 no feto 44 no print sala eleitorál hamutuk 24.  

Bazea ba kalendariu resensiamentu, STAE sei halo atendementu hodi halo resensiamentu eleitorál ne’e finaliza iha loron 15 fulan-janeiru tinan 2022.

Jornalista : Celestina Teles

Editór       : Cancio Ximenes

HAKEREK NO HATÁN

Please enter your comment!
Please enter your name here