Plenária Parlamentu Nasionál. Imajen Tatoli/António Gonçalves.

DILI, 20 setembru 2021 (TATOLI)–Plenária ordinária ne’ebé lidera hosi Prezidente Parlamentu Nasionál, Deputada Maria Angelina Lopes Sarmento, segunda ne’e baixa projetu-lei númeru 33/V(3a) kona-bá alterasaun dahuluk ba Lei númeru 5/2016, 25 maiu, ba Komisaun A.

Anúnsiu admisaun no baixa projetu-lei númeru 33/V(3a)-primeira alterasaun ba Lei númeru 5/2016, 25 maiu, ne’ebé estabelese prosedimentu konsesaun ba indultu no komutasaun pena.

Vise Prezidente Parlamentu Nasionál, Maria Angelina Lopes Sarmento. Imajen/Tatoli Egas Cristovao

“Ha’u konvida Prezidente Komisaun A atubele mai simu projetu-lei ida kona-bá primeira alterasaun ba Lei númeru 5/2016, 25 maiu, ne’ebé estabelese prosedimentu konsesaun ba indultu no komutasaun pena,” Prezidente Parlamentu Nasionál Eiz-Ezersísiu anúnsia liuhosi plenária.

Nia husu Komisaun A ne’ebé trata asuntu Konstitusionál no Justisa atu haree projetu-lei hodi halo ajendamentu iha nível komisaun, nune’e konvida entidade relevante fó sira-nia submisaun ba alterasaun ne’e.

Prezidente Komisaun A, Deputadu Joaquim dos Santos, simu ona projetu-lei ne’e hodi tau ba ajenda prioridade.

Parlamentu Nasionál seidauk bele fó-sai substánsia no razaun alterasaun ba lei númeru 33/V(3a)-primeira alterasaun ba Lei númeru 5/2016, 25 maiu, ne’ebé estabelese prosedimentu konsesaun ba indultu no komutasaun pena tanba sei halo análize ba projetu-lei ne’e.

Entretantu, Lei númeru 5 /2016, 25 Maiu kona-bá Prosedimentu Konsesaun Indultu no Komutasaun Pena (lei vijente) ne’e iha artigu hamutuk 11.

Lei refere define iha artigu 10 kona-bá revogasaun, númeru 1 hateten indultu no komutasaun pena bele revoga liuhosi dekretu prezidensiál, até momentu ne’ebé okorreria ho termu pena.

Númeru 2 hosi artigu ne’e dehan, revogasaun no promovida hosi Ministériu Públiku ofisiozamente ka solisitasaun hosi Ministru Justisa.

Númeru 3 hosi artigu ne’e hatutan, realizada dilijénsia instrutórial pertinente, juiz mak pronunsia no ordena remesa autos ba Ministru Justisa, ne’ebé sei haruka Prezidente Repúblika hodi hola desizaun.

Númeru 4 hosi 10 ne’e hateten, dekretu prezidensiál ne’ebé revoga indultu no komunika ba kondenadu, ba Ministériu Públiku no ba respetivu prosesu kondenasaun.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here