Plaka Serbisu Edukasaun Munisipál Bobonaro. Imajen Tatoli.

BOBONARO, 20 setembru 2021 (TATOLI)—Diretór Serbisu Edukasaun munisípiu Bobonaro, Crispin Moniz, husu ba estudante-sira iha postu administrativu Maliana no Cailaco, atu mantein halo kontaktu ho livru hodi hein desizaun Governu reativa aula prezensiál.

“Estudante-sira, liu-liu finalista-sira, kontinua kontaktu ho livru ne’ebé profesór-sira fahe ona, atu bele hamanas beibeik kakutak, nune’e iha aula normál, ita bele komprende matéria-sira,” Crispin Moniz, ko’alia asuntu ne’e iha EBF Oplegul, Segunda ne’e.

Notísia relevante:Serbisu Edukasaun Bobonaro prepara ba konstrusaun EBF Oplegul

Kona-bá re-ativa aula prenzensiál, daudaun ne’e serbisu edukasaun munisipál halo hela konsultasaun ho entidade relevante-sira hanesan, Autoridade Munisipál, saúde, Igreja no PNTL, nune’e bele hato’o pareser ba Ministru Edukasaun Joventude no Desportu (MEJD) atu bele foti desizaun.

Estudante Finalista Eskola Dom Martinho da Costa Lopes Maliana (DMCL), Georgino Romeo, husu MEJD atu re-ativa aula prezensiál, tanba tempu ezame nasionál besik ona.

Iha 02  setembru, MEJD hatun despaixu ho númeru 46/GMEJD/IX/2021, hodi suspende aula prezensiál iha postu administrativu Cailaco no Maliana durante semana rua to’o agora seidauk reativa, tanba evolusaun surtu Covid-19, kontinua rejista as iha fatin rua ne’e.

Evolusaun surtu Covid-19 iha 19 setembru 2021, Bobonaro rejista kazu Positivu ha’at, rekoperadu 31, ativu 129, komulativu rekoperadu 418, kumulativu kazu konfirmadu 556 no kumulativu óbitu sia.

Totál eskola iha Munisípiu Bobonaro, Pré Eskolár hitu, Ensinu Sekundária Jerál hitu, Tékniku Vokasionál Ualu, Eskola Bázika Filiál 127 no Sentru Ensinu Báziku 24 ho totál estudante Ensinu Báziku 6.494, Pré-Eskolár 2.000-resin, Tékniku Vokasionál 1.906 no Ensinu Sekundáriu Jerál hamutuk 3.696.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here