Diretór Servisu Saúde munisípiu Baucau, Domingos Reinaldo da Costa Guterres. Imajen TATOLI/Natalino Belo

BAUCAU, 20 setembru 2021 (TATOLI)–Diretór Servisu Saúde munisípiu Baucau, Domingos Reinaldo da Costa Guterres, hateten, ekipa konjunta kompostu hosi Ministériu saúde (MS) nasionál no munisipál, Sentru Intergradu Jestaun Krize (CIGC, sigla portugés) Baucau, Seguransa inklui líder komunitáriu sira ohin hahú investiga kauza óbitu na’in-54 iha postu Quelicai.

“Daudaun ekipa iha ona terrenu, sira ba atu foti dadus no halo investigasaun kona-ba mate iha Quelicai hamutuk na’in-54,” Diretór Servisu Saúde munisipál, hateten, iha edifísiu Rádiu Komunidade Lian Matebian, Villa nova, segunda ne’e.

Hosi infromasaun ne’ebé rekolla, óbitu hirak ne’e hotu iha sintoma COVID-19, hanesan isin manas, mear, dada iis ladi’ak no mesak ho idade idozu.

Nune’e, ekipa investigasaun sei halo teste rua hanesan rapid test no swab ba família no komunidade besik inklui sei analiza iha laboratóriu mak foin hatene kauza loloos.

“Depende ba informasaun ne’ebé iha, óbitu hirak ne’e hotu seidauk vasina, maibé dadus reál ekipa sei halo investigasaun,” Domingos akresenta.

Servisu Saúde halo ona kontaktu ho líder Komunitáriu iha postu Quelicai, atu hamutuk kolabora durante investigasaun hodi informa ba komunidade iha área ne’ebá atu partisipa másimu iha kampaña vasina.

Iha fatin ketak, Koordenadór CIGC Baucau, Adolfo Dias Marçal, hateten, objetivu ekipa konjunta destakadu foti dadus hodi analiza kauza loloos hosi óbitu iha Quelicai, alvu prinsipál ba teste maka família óbitu no komunidade iha área refere.

“Iha Quelicai seidauk fulan ida óbitu na’in 54 ona tanba ne’e ita atu identifika iha relasaun ho COVID-19 ou lae,” Adolfo hateten.

Iha inísiu fulan-setembru taxa mortalidade iha Quelicai hamutuk 54, ne’ebé mak maioria mai hosi komunidade idozu hosi suku hamutuk 15.

Tuir dadus hosi CIGC, munisípiu Baucau daudaun ne’e rejista óbitu hamutuk na’in-neen, ho totál kazu ativu hamutuk na’in-280, no totál kazzu rejistadu hamutuk 1.363, ne’ebé tama ona klasifikasaun transmisaun komunitária.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here