Plaka Serbisu Edukasaun Munisipál Bobonaro. Imajen Tatoli.

BOBONARO, 17 setembru 2021 (TATOLI)—Serbisu Edukasaun Munisipál Bobonaro, hamosu ona programa ida hanaran ‘kontribuisaun solidariedade, hodi fó solidariedade no apoiu ba família funsionáriu hosi edukasaun ne’ebé mate.

“Ami hamosu ideia ne’e desde 02 fevereiru tinan ne’e, atu kontribui no ajuda família bainhira funsionáriu hosi serbisu edukasaun munisipál Bobonaro mate,” Diretór Serbisu Edukasaun Bobonaro, Crispin Moniz, informa ba jornalista iha kna’ar fatin, sesta ne’e.

Notísia relevante:Tinan sanulu, SEFOPE haruka Bobonaro oan 3.894 serbisu iha Austrália-Koreia

Antes implementa programa ne’e, Crispin Moniz halo ona konsultasaun ho dirijente no profesór-sira hosi eskola Bázika Filiál, Sentrál, Sekundária Jerál, Tékniku Vokasionál no funsionáriu hotu.

Programa ne’e implementa liuhosi diskusaun lubuk ida ho dirijente eskola-sira, maioria aseita katak, bainhira funsionáriu ida lakon-vida, ema ida kontribui $1, hodi apoia ba prosesu funerál.

“Foin lalais ami nia profesora ida mate iha Ames, primeira vez ami implementa programa ida-ne’e. Ami apoia osan ho montante $1.413 ba família enlutada, osan ne’e ha’u ho superintendente no dirijente eskola-sira mak ba entrega,” nia hateten.

Maski programa ne’e implementa ona, maibé seidauk iha ninia transparánsia, entaun dirijente sira  hamosu tan ideia ida hodi kria fali ninia estatutu, nune’e bainhira, iha funsionáriu ruma mate, Diretór edukasaun bele uza ninia kompeténsia hasai sirkulár ba funsionáriu hotu iha Bobonaro atu halo kontribuisaun.

Estatutu hosi programa ne’e maioria funsionáriu hotu aseita no iha tempu badak sei aprezenta ba Ministériu Edukasaun Joventude no Desportu (MEJD), hodi tau konsiderasaun.

Totál funsionáriu Serbisu Edukasaun munisípiu Bobonaro, hamutuk 1.621, kompostu hosi funsionáriu eskritóriu, profesór no funsionáriu INFORDEPE.

Jornalista: Sérgio da Cruz

Editór: Cipriano Colo

1 KOMENTÁRIU

  1. IHA LEI EXECUSAUN OGE 2021, ARTIGO 35 PONTU 3 hateten katak funsiunariu ne’ebe mate iha instituisaun nebe funsiunariu ne’e haknar an ba sei hasai osan husi 500 dollar iha ambitu urjente to’o 3000 dolar ba despeza.

HAKEREK NO HATÁN

Please enter your comment!
Please enter your name here