Sekertáriadu Estadu Kooperativa, Elizário Ferreira. Imajen TATOLI/Francisco Sony

LAUTÉM, 17 setembru 2021 (TATOLI)–Sekretáriu Estadu Kooperativa (SEKoop), Elizário Ferreira, enkoraja Kréditu Uniaun (CU, sigla portugés) Moris-Foun iha aldeia Titilari, suku Fuiloro, postu administrativa Lospalos, munisípiu Lautém, atu expande tan atividade kooperativa.

“Imi bele loke imi-nia klínika ida tau naran klínika kooperativa Moris-foun Fuiloro. Nune’e, membru hosi kooperativa halo tratamentu saúde la presiza selu no ema seluk la’ós membru bele kontribui,” Sekretáriu Estadu Elizário Ferreira, hateten, durante vizita ba instalasaun kooperativa, iha suku Fuiloro, sesta ne’e.

Notísia relevante: Kooperativa CU Moris-foun Lautém presiza akompañamentu hosi SEKoop

Governante ne’e dehan, bainhira kooperativa loke klínika, Lautém-oan sira ne’ebé mak ramata estudu iha área saúde públika no farmásia bele kontribui.

Iha fatin hanesan, Sekretáriu Kooperativa CU Moris-foun, Jacob Guimarães Zacarias, sei halo diskusaun hamutuk ho estrutura no membru sira molok estabelese.

“Ami sei haree, bainhira atividade kooperativa nian la’o di’ak, iha posibilidade ami loke klínika tuir ideia hosi Sekretáriu Estadu, tanba ne’e idea  di’ak, maibé membru tama barak tan mak ami bele realiza,” nia dehan.

Kooperativa ne’e ninia atividade maka fó empréstimu entre membru sira ho juru kiik, kuandu foti menus hosi $2.000 ho juru 2%, enkuantu $2.100 to’o $10.000 juru 1%.

Kooperativa CU Moris-foun harii iha loron 09 juñu 2002, akumula ona membru hamutuk 443, ne’ebé antes ne’e iha ema 500 resin maibé balun rezigna-an no balun mate, maibé konsege halibur ona osan $290.000 resin.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here